Чи поэзияда цIийи гъед куькIуьзва

ЦIинин зулухъ 20 яш тамам жезвай Владик Батманов лирикадай "Йисан шаир" премиядин лауреат хьанва.
Алай йисан Яран Суварин йикъара чун-"Марвар" литературадин кIватIалдин членар Магьачкъаладиз мугьманвилиз фенвай. 
Гатфарин сифте йикъарикай са рагъдан береда чи делегация Расул Гьамзатован тIварунихъ галай милли улубханадиз атана. Дараматдин кьвед лагьай гьавадиз хкаж хьайила, чи вилик вич чинай чидай, амма чин-чинал сифте яз аквазвай са жегьил экъечIна чаз хваш-бешна:
-Куьн атурай, Рагъ атурай!-лагьана ада чи гъилер кьуна, мярекат кьиле фидай залдиз тухвана.
Зи патав гвай Римма Гьажимурадовади жузуна:
-Чаз интернетдай чидай Владик тушни и жегьил?
-Я! - лагьана за, - викIегь гада я, кьве югъ вилик ам Москвада суварихъ галай тир, хтана агакьнава!

Эхь, Владикан рахунар, юзунар, чIехи-гъвечIи чир хьун-алай девирда гьар са жегьилдихъ аквадач ваз! Чина мили хъвер аваз акьван верцIи рахада и гада! Гьалал хьурай ам хана-хвена, чIехи авунвай диде-бубадиз!
Батманов Владик Нафиран хва I995-йисан I6-октябрдиз Магьарамдхуьруьн райондин Хуьрелрин хуьре дуьнядал атана. Юкьван мектеб хайи хуьре акьалтIарай жегьилди алай вядеда Дагъустандин Девлетдин Университетда, лезги филологиядин факултетда кIелзава.
2012-йисуз Владик Батманова "Билбил" тIвар алай улуб чапдай акъуднава. Саки яхцIурдав агакьна шиир гьатнавай и улуб пуд хилез пай жезва.
РикIе халкьдин тIал аваз,
Адан дерди-гьал акваз
Мецел дидед чIал алаз,
Шиир кхьихь, Владик!- лугьузвай жегьил заридин улубдин сифте кьиле хайи чIал, Ватан, ватан канивал яру цIар хьиз физва:
Лезги гафар-руьгьдин девлет, 
ЧIалаз, халкьар, ая гьуьрмет.
Авайди туш чIалан къимет,
РикIин шагьдамар лезги чIал.
Зариди маса шиирда вичин таяр-туьшерихъ элкъвена икI лугьузва:
Чир хьун жуваз гьуьрмет, хатур,
Адетар хуьз, бубайри тур,
Герек хьайтIа, чанни кваз гур 
Инсан хьунухь квяй я, дустар!
Вич жегьил яз, ашкъидикай кхьин тавунайтIа Владика, ам айибдай чна вирида!
И дуьнядал, икьван гуьзел,
Ви шикил за хуьзва гъилел.
Чун кьвед санал ширин мецел,
Мус рахада, чан каниди?
Улубдин кьвед лагьай кьил "Муьгьуьббатдин вилаятда" тIвар алайди хьанва. Ина жегьил рикIин хъуьтуьл гьиссер, шаирдин ярдихъ авай цIигелвал аквазва кIелчийриз.
"Хайи хуьр машгьур ийиз" алахънавай Владика Шагьдагъдин, Шалбуздагъдин, Самурдин тарифни ийизва:
Садакьаяр суфрайрик кваз,
РикIе михьи ният аваз,
Зи садлагьай ктабни гваз
Мугьман хьана Шалбуздагъдиз.
Шиирар газетриз, журналриз, алманахриз акъатнавай Владик Батмановаз чи халкьдин тIвар-ван авай векилри хъсан къимет гузва.
Адан гьакъинда Сажиддин Саидгьасанова, Исамуддин Агьмедова, Куругъли Ферзалиева, Эйваз Гуьлалиева ва масабуру хуш келимаяр лагьанва. Эйваз Марвара адаз "Мерд зари" лугьуз эверда. Шаирдин кьве шиир "Лезги поэзиядин антология" (Баку, 20I3-йис) улубдани гьатнава. 
Владик Батманов "Хайи чIал" тIвар алай Вириурусатдин конкурсдин гъалиб я. 20I4-йисуз ам лирикадай "Йисан шаир" премиядин лауреатни хьанва.
Алай йисан зулухъ 20 йис бегьем жезвай Владик Батмановаз чна мадни зурба агалкьунар тIалабзава, "Шиир кхьихь, Владик! Гзаф кхьихь, Владик!"-лугьузва.

Вакъиф Муьшкуьрви
"Кцlар" газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.