Перейти к основному содержанию

За зи дагълар манийривди жагъурна...

КIуррин хуьре 1931-йисуз дуьнядал атай Агъамегьамед Беделован саки вири уьмуьр Самур поселёкдихъ галаз галкIанваз хьана. Институт акьалтIарна инин мектебда сифте муаллим, гуьгъуьнай 25 йисалай артух береда директор хьайи ада вири районда хъсан педагогди хьиз гьуьрмет къазанмишнавай. 
Поэзиядал рикI алай Агъамегьамед муаллимди 1957-йисалай лезги чIалал шиирар кхьиз башламишна. Адан сад лагьай шиир 1959-йисуз Дагъустандин лезги чIалан "Коммунист" газетдиз акъатна.
Бакуда басмадай акъатнавай "РикIин гаф", "Бахтунин эквер", "Бахтавар чил" ва маса алманахра Агъамегьамед муаллимдин гзаф шиирар гьатнава.
1995-йисуз дуьня дегишаруни шаирдиз вичин "Зи къерез" тIвар алай кьилди ктаб басма ийидай мажал ганач. Зегьметдикай, муьгьуьббатдикай, инсанрин ва халкьарин дуствиликай кхьенвай шиирар гьатнавай и ктабдай бязи чешнеяр гуналди чна шаирдин руьгьдин вилик чи буржи кьилиз акъудзава. ГьакIни чаз и ктаб басма авуниз куьмек гудай ксар жагъунал чIалахъ жез канзава.

Зи сивин хъвер, зи ашкъи
Пичина цIай, патав баде, аялар,
Къулал чайдан ягъиз мани демина,
И сегьнедиз тамаш ийиз гьа инал
Са кьезилвал гьатзава зи хамуна.
АкI жемир зи чайдал ала рикI пара
Чи булахдин къайи ятар хъсан я,
Зи сивин хъвер, рикIин ашкъи, секинвал
Шад уьмуьрдин къужахдавай хизан я.


Чидачир заз
Аял чIавуз эцигна кьил
Зи бубадин хурудал,
Тажуб хьана алтадна гъил
Адан рехи чурудал
Лугьудай за:-Михьа, буба,
Тамир чIарар зерени,
Куь суфат пис къалузва
Са фикир це куьнени!
Чидачир заз лацу чуру
Кьуьзуь касдин абур хьун.
Чидачир заз зи уьмуьрда
Чи рикIериз сабур хьун.
Чидачир заз каф жедай чIал
Кьуьзуь Шагьдин кьацIарал...
Хуьр дагълара илигин

Эцигнава зи хуьр кама бубайри
Чайгъундикай чуьнуьхнавай аял хьиз,
Анжах лекьре кигида муг рагарал
Дагъдин кукIвал алай муркад ккIал хьиз.

Зи эллерин гьунар вацран яхадал
АлкIанва къе зегьметдин са орден яз,
Зи гъвечIи халкь чи миллетрин арада
Къе кьастарал хьанва мягькем гьуьлдан яз.
Жемир, буба, куьн чахъай къе инжиклу
Це ихтияр, хуьр дагълара илигин
Хьанва адет лекьериз гьа сифтедай
Рагарилай инай агъуз килигин.

Чи гуьзгуьяр

Ханва екез чи хуьрера
Берекатар, гьуьрметар,
Авачизни туш гьарданбир
Акъулдин гьахъ туьгьметар,
Зи намус я, зи калам я
Чи хуьрера чIехибур,
Заз камалдин ктабар я
Гьа и чуру рехибур.
Гьабур я заз авурди чир
Абур, гьая, берекат,
Зегьмет, ашкъи, элдин къадир,
Уьмуьрдин рехъ, гьерекат.
Гьабур я заз авурди чир
Жуван къамат илигиз
Лугьузва за чи гуьзгуьяр,
А кьуьзуьбруз килигиз.

Кьве гаф
Экуь дуьня хуш я гьелбет, шак авач,
Анжах далу агалд жедач ажалдив.
Кан хьайила кIватIна гъилер-кIвачерни,
Къекъвез тадач ада вун гьич мажалдихъ.
Тапшурмишна вичин уьмуьр инсанрив
Фида инсан уьмуьрда таз нехишар.
Я пис тир ам, я хъсан тир лугьудай
Кьве гафунихъ авуна чан дегишар.

Анжах зи чан дегиш тахьуй гафарихъ
Ам крарихъ дегиш хьунухь кан я заз.
Залай са шеъ амукьайтIа дуьняда,
Ам уьмьурлух рекьин тийир чан я заз.
ЦIийи женгер

Жегьил уьмуьр алатзава пашман яз
ЧIарарал жив ацукьнава гатузни,
Гагь пад гуз зун цуькверилай алатиз
Гагь канзава рикIиз абур атIузни.
Пис ниятри лугьузва: вахъ вуч ама?
Ви илгьамдин вилер гила буьркьуь я.
-Ваъ,-лугьузва хуш ниятри кIевелай
Чи элдин рехъ гила мадни гьяркьуь я.

Яшарилай шикаят туш- ажал вич-
АлахъайтIан зи эхир югъ йигинриз
ЭгечIда зун цIийи-цIийи женгериз
Гележегдин мурад-метлеб якъинриз.

Зи бахт
Бахт къуват я, бахт алакьун, векъивал,
Бахт чирун я, къе девирдин чIаларни.
Кьил цифера аваз жеда гьамиша
Къуьн- къуьне тваз агалтайла дагъларин.
Бахт инсандин виждан, адан михьивал,
Гьуьрмет къалун кьейидазни-диридаз,
Ингье зи бахт, къад йис я зун малим яз,
Зегьметдикай пай ганва за виридаз.
Экуьнилай няналди классра
Зун бахтарив рахазава датIана
Бахт тушни бес гележегдин кьегьалри
Цуькверин кIунчI гъиле вугун атана?

Дагъларни зун
Хайи чIалал маниярна
За дагълара, рагара
А манийри хъувуна ван
Элкъвена зи япара.
РикIе ашкъи авай дагълар
Акьуна зи гъавурда,
За зи дагълар гьа и жуьре
Манийривди жагъурна.

Цав
Гагь-гьагь дакIваз-элекьда вун,
Яда на чун хьелерив.
Гагь гугрумиз асунда на
Чилер жуван вилерив.
Гагь къурда на лацу живер
Кефер патан къаяр кваз,
Гагь вуна рагъ ракъурда чаз
Къибле патан цIаяр кваз.
Алахда на чи кьилелай
Гагь цуьквер, гьагь ири хар.
Лагь кван, эй цав, вучиз ква вак
Шаирвилин къилихар?!
Сандик тахьурай

Сятдин спелри къачузва тади
Ргазвай рикIерикай хабар авай хьиз.
Алцумай, атIугъай еришдив вичин
Инсанрин уьмуьрдиз тарихар кхьиз.
Сят кардик гала, суткадин къеняй
Секундар, минутар тарашзава зи
Лугьумир, жувазни авачиз хабар
Гъиликай уьмуьрдиз тамашзава зи.

Тараша, пашман туш вуна зи уьмуьр
Анжах зун кIвачерал чандик тахьурай,
Алакьай йикъар зи гьисабдик кутур,
Буш йикъар гьич садни сандик тахьурай.

Кцlар газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.