Умуд галай ЧIалар

Умуд галай ЧIалар

Вуч хъсан я, чахъ шиирар кхьизвай, гьакIни дидедин чIалал теснифзавай же-гьилар ава. Къе интернетди инсанриз проблемаяр арадал гъизватIани, абур сад-садав агудни ийизва. Адан куьмек яз гила захъ тIварцив чидай, чин такур цIудралди дустар ава. И дуьнядин саки гьар са пипIей, поэзиядин аламатрив ацIанвай дуьнядиз сифте кам вегьизвай же-гьилрин, кIелзавайбурун, сенятдин дустарин чарар хкведа. Эхь! Канивал, вафа, бахт шиирдин цIарара жагъурзавай, регъуь, кичIе, хвеши вилерив килигзавай жегьилрин чарар къведа зал. Ихьтин же-гьилрикай, иер шиирар кхьизвай са таватдин, хуьрелви Султанагьмедан руш Эсмира Бейбутовадин шиирар за "Qusar-КцIар" газетдиз рекье тун кьетIна. Эсмира Яран руш я: 1994-йисан 22 мартиниз Хуьрелрин хуьре дидедиз хьанва. Яран рушан шиирра гатфарин атир, верцIивал ава. Заз шиирар ракъузвай жегьилрин бендер кIелда, меслятар гуда, шиирдин кIалубар, амална канзавай къайдаяр гъавурда твада. Татугайвилер чпив туькIур хъийиз тада. ГьакIни Эсмиради заз шиирар рекье турла за адаз зенгна, шиирар кIелиз-кIелиз цIар-цIар тегьлилна, жуван фикирар лагьана. Адан са шиир "Алам" журналдиз акъудна, чи "Марвар" литературадин межлисдиз эвер гана. Межлисдал Эсмирадин мад са алакьунни акуна чаз: адаз пара иер дикция, шиир кIелдай талант ава. Межлисдин иштиракчийри адан эсерриз хъсан къимет гана. Исятда зи вилик Эсмирадин шииррин дафтар гала. Хвеши я заз: вучиз лагьайтIа, шиирар вичи туькIуьр хъавунва, абур къвердивай иер жезва. Алахъзава руш. Фикирар, гьиссер михьи, иер я. Эхь, шиирда кьиса ваъ, аквазвай кьисадикай кьабул авур гьисс къалурна кан я. Эсмира, и гафунин дуьнядиз вун атуй рагъ атуй!

Эйваз Гуьлалиев, 
шаир-муаллим, Чпир
"Кцlар" газет

Лезги чIалал рахада

ХьайитIани Ватандилай яргъара, 
Лезги чIалал рахада зун гьевесдив. 
Лезги манид ван кими жеч япара, 
Жуван чIалаз, нефес гуз-гуз нефесдив.
Ватанди чаз эверайтIа ша лугьуз, 
Кьве гъил цава, лув гуда за хвешила. 
Са жуванда, ахъаяйтIа гъил вичин 
Тадач ама, са чIавузни гишила.

Дурнаяр хъфизва

Зун мадни хьанава рангарал ашукь, 
Ажеб цIару хьанва пешер тараллай. 
Эгь, вили цаварин, наз гвай ярашух 
Дурнаяр хъфизвай, экуьн яралай. 
Агь, са шел акатна, вилерихъ къайнар 
Куьч кIватIна хъфизвай, къушар акурла, 
Цавара цIиргъина авай дурнаяр, 
ЧIугварди чIугурдаз ухшар акурла. 
Чилел хразмай кьван, зулу кьалича 
Ял ягъан накьвадал, рикIяй фидайвал. 
Цифери кьазва кьван, цаварал чка 
Гугрумар авунив, вичиз чидайвал. 
Дурнаяр хъфизва, зун туна ялгъуз 
Цаварни ишезва, къвазва стIалар. 
Гагь-гагь рагъ килигиз дакIардай агъуз 
Байихиз хъфизвай, зи рикIин тIалар.

Рагъ

Зар квай кифер, вегьена рагъ къуьнериз, 
Экуьн кьиляй атанвай чи эллериз, 
Хъуьрез авай чинай, нурар алахиз 
Памбагар хьиз, тарал алай цуьквериз. 
Генг цавариз акъатнавай суна хьиз, 
ТIебиатди дамахзава ашкъидив. 
Дуьня вири лап къужахда кьунвай хьиз 
Шадарзава хуьтях тежер къайгъудив. 
Кьил винизна вил вегьейла цавариз, 
ЦIарцIар гузвай, ракъинин экв аватна. 
Нур гуз авай и дуьнядин къатариз 
Рагъ акуна, дердер чандай акъатна.

Ви вилер

Зи фикирдай акъатзавач, 
Заз килигай а ви вилер. 
Вун авачиз тIар хьана рикI 
Рекьева вил, ая эвер. 
Вун ишезва, заз муьгьуьббат, 
Дуьня вири, хьана мичIи. 
Вилин накъвар авахьайла, 
Чилер, цавар кьуна селци. 
Хабар авач хиялрикай, 
Кьуд пад тамам жезва серин. 
Вафа течир и дуьняда, 
Вун галачиз я чан ширин.

Лагь ашукь

И дуьнядиз ви вилерив килига 
Чуьнгуьр кьуна, чаз са мани лагь ашукь. 
"Шагьзададал", "Лезгинкадал" илига 
Ви манияр хьурай элдиз ярашукъ. 
Са вил ягъаз, чуьнгуьрдиз на хураллай, 
Хъсанбур на, хъсанбурув агуда. 
Аватзавай къуру пеш хьиз тараллай, 
Четинвилер зи рикIелай алуда.

Ишез кан хьана

РикI атIана, ви вилел нагъв акуна, 
Гьикьван чIав тир, заз вун сефил такуна. 
Гьар са стIал зи хатурдихъ акьуна, 
Вун акуна зазни ишез кIан хьана. 
Жув гьиссерин гъиле тагуз алахъна, 
Файда хьанач, вилерай гьуьл авахьна. 
Вучиз вуна, икьван пис тир кIвалахна 
Вун акуна зазни ишез кIан хьана. 
Хъуьрез-хъуьрез и кар негьиз кан хьана, 
Акъвазнай зун са кIус эхиз кан хьана, 
Чир тавуна, вилер михьиз кан хьана 
Вун акуна зазни ишез кан хьана.

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.