Махачкаладин «Дагестанское книжное издателство»да 300 тираждал чи сейли зари Азиз Мирзебекован «Жавагьиррин хазина» тIвар алай улуб басмадай акъатнава.
Китабда дуьнядин эдебиятдин корифейрикай тир Рудакидин, Фирдовсидин, Омар Хайяман, Ширазидин, Жамидин, Назим Гьикметан, Махтумкъули Фарагъидин, Сайморо- дин, Исюдин, Шекспиран, Байронан, Гётедин, Гейнедин, Франческо Петраркадин, Крылован, Пушкинан, Лермонтован, Некрасован, Есенинан, Тарас Шевченкодин, Шота Руставелидин, Физулидин, Вакъифан, Семед Вургъунан, Къабилан, Жамбулан, Муса Желилан, Расул Гамзатован ва масабурун шиир- рикай чешнеяр гьатнава. Вари и шиирар сенеткарвилин вини гьавада лезги чIалаз элкъуьрнавайди чи сейли зари Азиз Мирзебеков я. Дуьнядин шииррин жавагьирар чав чи дидед чIалал поэзия агакьархъувур кирамдин къастарикай садни са вахтара дуьняда гафалаг авай 6 миллетдикай сад тир Албан (лезги) чIал, култура авай халкьарин жергедив агуд хъийин я.
“Азиз Мирзебегов лезги эдебиятда бажаракьлу шаир, таржумачи ва литературавед хьиз машгьур я. Вичин яратмишинрин гьар са хиле ада вичин агалкьунар къалурнава ва къакъан дережеяр муьтIигъарнава. Шаирди вичин тик рехъ агалкьунралди давамарзава.
Таржумайралди Азиз Мирзебековаз вуч лугьуз канзава?
Абурал алахъунин мураддихъ кьве хел ава. Сад лагьайди, лезги авторри маса чIаларал кхьенвай къадим эдебият хайи халкьдив ахгакьурун. Кьвед лагьайди, иллаки дуьньядин шииратдикай рахайтIа, хайи халкьдиз халис шииратдин чешнеяр гьхьтинбур ятIа къалурин. Ихьтин лазимвал къенин девирда генани артух хьанва. Вучиз лагьайтIа, къенин юкъуз чи кIелдайбурув газет- журналдай агакьзавай шиирар кIелейла, авторривай шииррин пис- хъсанвилин, чIуру- дуьзвилин, даяз- деринвилин уьлчмеяр квахьнавай хьиз аквазва. Алай аямдин чи поэзия гъилерихъди шит жезва. Им кьилди рахадай месела я. И кар дериндай аннамишзавай Азиз Мирзебегова виликай акъудай таржумайрин кьве ктабди(«урис шииратдин хазинадай» ва «Жавагьиррин таж») чи рикIел шаирвилин ва шиирдин мана-метлебдин мизан терезар гьихьтинбур хьун лазим ятIа хкизва. Гьа идалди адан и кьве ктабдин къиметлувални артух жезва.
Исатда кIелзавайбурун вилик эцигзавай «Жавагьиррин хазина» лезги таржумачиди икьван чIавалди авунвай вири таржумайрикай хкяънавайбурикай ибарат хьанва.
Таржумачи Азиз Мирзебеговавай Етим Эминанни СтIал Сулейманан чIалалди дуьнядин халкьарин шаирар «рахуриз» алакьуни чи дидед чIалахъни гьихьтин зурба такьатар ва мумкинвилер аватIа къалурзава ва ихьтин дережайрин къадар хьунихъ ва а къадурлувал артухарихъ эвер гузва”.
Арбен Къардаш
Журнал "АЛАМ"
Добавить комментарий