"Лезги поэзиядин антология" улубдин кирам Вакъиф Муьшкуьрвидихъ галаз куьруь ихтилат

-К1вал къени хьурай, Вакъиф муалим, чи гъилевай улуб гьик1 хьана арадал атана ва Куьне адан винел гьикьван к1валахна?
-Куь к1вални къени хьурай. Зун филолог я, яргъал са хуьре муалим к1валахзава. Гьак1ни 15 йиса авай ч1авалай гъиле къелем авай кас хьунихъ галаз сад яз, за саки къанниц1уд йис жезва чи ч1алай азербайжан ч1алаз, а ч1алай лезги ч1алаз шиирар элкъуьриз... 2010-йисалай и к1валах мадни яц1а гьатна, нетижа хьизни Квез и улуб аквазва.
-Куьне гьик1 фикирзава, и улубдикай нивай менфят къачуз жеда?
-Улубдикай лезги ч1ални литература чирдай ксаривай, хайи ч1алал к1ел-кхьин течизвай лезгийривай, лезги поэзиядал кьару ксаривай, гьак1ни тарсун ктабар агакь тийизвай мектебра к1елзавай аялривайни абурун муалимривай хийир къачуз жеда.
-Вилик акъатнавай лезги поэзиядин антологийрилай и улубдин кьет1енвал вуч я?
-Заз чидайвал, идалай эвел чи кьве антология чапдай акъатнава(1958,1978). Ц1ийи улубдин кьет1енвилерикай садлагьайди, и антология кьве ч1алал я, кьведлагьайди, виликан улубрихъ XVIII-XX вишйисарин зарияр акатнавайт1а, идахъ VII-XXI вишйисарин лезги поэзиядин векилар гала. Сифте яз, Билисанви Гуьлгер тават, Абу-Тагьир Нихави, Ст1ур Далагь хьтин лезги шаирар антологияда гьатнава.

 -Улубдик акатна кан яз, амма къерехдихъ кумукьнавай зарияр авани?
-Ава. Рик1из кандай Давдакьан, Рухун Алидин, Алкьвадар Гьасанан, Т1игьиржалви Имиралидин, Сажидинан, Майрудинан ва маса шаиррин эсерарни акатнайт1а...
-Улубдихъ рехнеяр, гъалат1ар гала лугьузвайбурни ава…
-Эхь, ахьтин гафар-ч1алар зи япарихъни галукьзава. К1валах ийизвайдахъ гъалат1ар галаз хьун т1ебии кар я, им сад. Кьведлагьайди, и улубдихъ са ц1иргъ себебар аваз кьилди редакторар, рецензентар, корректорар хьанач. Пудлагьайди,а гьарай-эвер твазвайбуру зал икьван вегьинар ийидалди, чпи акъудзавай зат1арал вил вегьенайт1а хъсан жедай, куьз лагьайт1а абурун кхьинрихъ зи улубдилайни гзаф гъалат1ар гала.
-Чаз ван хьанва, Куьне улубдин кьведлагьай чапдин винел к1валахзава…
-Эхь, гьак1 я. Улубдихъ акатнавай гъалат1ар хкудзава. Абур заз къалурай В.Севзихановаз, Ф.Нагъиеваз, М.Эрзимановаз, Б.Заловаз ва мсб. за паракьван сагърай лугьузва. Мадни са шумуд шаирдин эсерар хкягъна азербайжан ч1алаз элкъуьрнава(Рухун Алидин, Зулейха Султановадин, Эфруз Регьимовадин, Шагьмардан Агъакишиеван).Кьисмет хьайит1а, сад-кьве йисалди винел к1валах хъувунвай ц1ийи вариант чап хъийида!
-Чаз малум тирвал, "Шарвили" эпос урус ч1алаз элкъуьрна чапдай акъатнава. Жедачни лезги халкьдин и эпос азербайжандал элкъуьрна кьилди улуб хьиз чап авурт1а?
-За антологиядик чи эпосдай кьуд мах кьве ч1алал кутунва. Куьне дуьз лугьузва, чун "Шарвили"эпос чара халкьарин арадани шира авунал алахъна канда. Гьак1 хьайила мукьва вахтара и кардал эляйч1да зун.
-Улуб акъатна са шумуд варз алатнава. К1елдайбуру ам гьик1 кьабулнава?
-Рик1ивайни, улуб акъатайдалай инихъ варцар алатнава. Чна улубрин са пай пишкешни ганва, масани ганва. Гаф кватай чкадал лугьун, улуб чап ийидайла зи гъил кьур вири стхайриз михьи рик1яй разивал малумарзава, чпин жибинрик берекат акатуй лугьузва! Гьам чи халкьди, гьамни азербайжанвийри антология хъсан кьабулзава, и кардални зун гзаф шад я!
-Вакъиф муалим,Квез туьк1уьрунрин рекьера мадни ч1ехи агалкьунар т1алабзава. Паракьан сагърай!
-Куьнни сагърай!

Ихтилат кхьейди К.Аламви я.

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.