Кроссворд (ингилис чlалалди crossword – гафар элячl хьунухь) – дуьняда гегьеншдаказ чкlанвай гафарин къугъун я. Вичихъ чара-чара жуьреяр, кIалубар авай кроссвордри, ам гьализ алахъзавайбурун кьатIунар, дуьняакунар, зигьиндин деринвилер синагъдай акъудиз тада, хайи чIалакайни чиликай, машгьур инсанрикай, арифдаррин гафарикай, мисалрикай веревирдер ийидай мумкинвал гуда.
Чахъ маракьлу кроссвордар, интеллектуал машгъулатар тIуькIуьрдай инсанар пара хьанатIани (Элгьет Саидов, Эмирмет Новрузов, Жалал Жалалов ва мсб.), лезги чIалал абур туькIуьрунихъ кьил кутурди рагьметлу Эмирмет Новрузов хьана. 2008-йисуз Бакуда адан яратмишунрикай ибарат "Интеллектуал машгъулатар" тIвар алай ктабни басмадай акъатна. Интернет арадал атайдалай гуьгъуьниз лезги интеллигентри, кхьирагри чпин авсиятар мадни гегьеншарна. Чи жегьил дуст, муаллим, журналист Куругъли Ферзалиева чи электрон адресдиз са-садалай маракьлу кроссвордар ракъурна. И мукьвара "КцIара” мугьман хьайи жегьилди редакциядиз пешкеш авур вичин "Виш кроссворд" тIвар алай сифте ктабди чун гзаф шадарна.
-Кроссвордар чапзавай кьилдин газетар, журналар гзаф кьадарда ава.-лугьузва Куругъли Ферзалиева-Гьар жуьре илимриз талукь суалар авай кроссворд тамамдаказ ацlурун патал тlимил чирвилер бес жезвач. Гьавиляй жуьреба-жуьре гафарганрикай, энциклопедийрикай, атласрикай менфят къачуна кан жезва.
Лезгидал туькlуьрнавай кроссвордрал рикl алайбурун кьадарни йис-сандавай артух жезва. Ял ядай чlавуз кроссворд ацlурунал машгъул жезвай инсандин къанажагъдизни хъсан патахъай таъсирзава. Кроссвордри жуьреба-жуьре хилериз талукь суалриз жавабар жагъурун тlалабзава ва абур ацlурунал машгъул инсандин чирвилерни, шак авачиз, артух жезва.
Кроссвордрин жуьреяр гзаф ава: кроссворд, кроссчайнворд, чайнворд, цифрайрин кроссворд, сканворд, числобус ва хейлин масабур. И кlватlалда гьатнавайбурун чlехи пай адетдин кроссвордар я. Гьакlни кроссчайнвордар, сад-кьве чайнворд, числобус ва сканворд ава.
Куругълиди туькlуьрнавай и кроссвордрин кlватlалдикай неинки са зигьиндин машгъулатрал рикl алайбурувай, гьакl мектебра хайи чlалан тарсара аялрин чlал гегьеншарунин макьсаддалди муаллимривайни менфят къачуз жеда. Кроссвордра чна рахунра са артух менфят къачун тийизвай, чlалан сагьибрин рикlелай саки алатнавай гафарин кьадар пара хьунухьни дуьшуьшдин кар туш.
Кцlар газет
Добавить комментарий