Рикlелай тефидай чlалар

Лезги поэзиядин туьхуьн тийир гъед ,чи классик шаир Етим Эминан эсерар кIелайла, инсандин чандиз са кьезилвал, регьятвал къведа, галатун алатда, рикI хуш митI-митIрив ацIуда.
Заридин тIвар Мегьамед-Эмин Севзиханан хва тир. Уьмуьрдин къене вичиз фейи азиятар себеб яз, ада гуьгъуьнай "Етим" хьтин тахаллус кьабулнай.
Сая халкьдин ацукьун-къарагъуникай кхьенвай шииррихъ галаз сад хьиз, Эминаз гзаф кьадар лирикадин (муьгьуьббатдин) шиирарни ава. Месэла: "Акваз кIан я", "КIани яр", "Я бахтавар", "Гуьзел Тамум", "Туьквезбан" ва мсб.
Къе чна квез вичикай ихтилат ийидай "Гуьзел" тIвар алай шиирни и цIиргъиник акатзава. 
Етим Эминан чIаларик миливал, верцIивал, цIалцIамвал ква. Гьавиляй абур регьятдиз кIелиз, хуралайиз ийиз, аваздин жигьетдай устIадвилелди туькIуьрнава лугьуз фад манидални элкъуьриз жеда. Иниз килигна, Эминан чIалар, вич рагьметдиз фейидалай виш йисар алатнаватIани, халкьдин рикIера, мецера амазма, идалай кьулухъни гьакI жеда! 
"Гуьзел" тIвар алай шиир гьикI арадал атана? Лугьун тавуна жедач хьи, и шиир са касдин кьилел атанвай дуьшуьшдикай я, хьайи кар я. Са жегьилдиз са руш кан жезва. Рушани вичин разивал малумарзава. Амма са тIимил чIавалай гададив хабар агакьзава хьи, кIани рушан вил гила маса жегьилдал ацукьнава. ЧIуру хабар галукьай, "рикIин гъал атIай", ийир-тийир хьайи чи “игитдин” рикI тек са вичин ярдикай ваъ, гьакIни амай вири дишегьлийрикай хазва, ада "дишегьлидикай дуст хукъун" туба ийизва, и дуьняда амукьунилай кьиникь хъсан тирди малумарзава.
“Вишра ван атунилай садра вилиз акун хъсан я,”-лугьуда бубайри. ГьакI хьайила, ша чна "Гуьзел" санал кIелин.

Вагиф Муьшкуьрви
"Кцlар" газет


Гуьзел

Мубаракрай ваз ви ашна,
Ваз маса яр хьана, гуьзел.
Икьван гагьди чидачир заз,
Гила хабар хьана, гуьзел.

Хьайивал хабар галукьна,
Квелай ихьтин кар алакьна.
Вучда за дуьняда мукьна,
Икьван рикI тIар хьана, гуьзел.
Туба хьуй мад яр хукъуниз,
Ихьтин крар мад хъувуниз,
Дишегьлидкай дуст хукъуниз,
Квел ихтибар гъана, гуьзел.

Етим Эмин, лагь, на са чIал,
Минетдалди ийиз шел-хвал.
Гил атIана зи рикIин гъал,
Къакъатна вун яргъаз, гуьзел.

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.