Миллетдин такабурвал

Йисар, вахтар къвез алатзава. Им тIебиатдин къанун я. Чи миллетдин такабурвал тир СтIал Сулейман хайи йисни къвердавай яргъа жезва. Амма адан шиират несилрив гума! Гьар йисуз хьиз, гилани 18-майдиз Агъа СтIалдал шаирдин шииратдиз талукьарнавай чIехи мярекат кьиле фена. Са шумуд юкъуз хкат тавуна къваз хьайи марфарилай гуьгъуьниз и югъ акьван гуьлуьшанди хьана хьи, тIебиатдиз Сулейманан руьгьдикай хабар авайди хьиз тир. Райондин администрациядин, идарайрин руководителар Агъа СтIалдал пакаман сятдин 10-даз, кIватI хьанвай махлукьатди, гъилера къизилгуьллер аваз, далдам зуьрнедин ван кьилеллаз, хушдиз кьабулна. И мярекатда РФ-дин Госдумадин депутат Мамед Абасова, Дагъустандин халкьдин шаир Хуьруьг Тагьиран хва Максим Алимова, райондин ва къунши районрин хуьрерай атанвай векилри иштиракна. Шаирдиз икрам авун яз, адан памятникдив таза цуьквер эцигна, аманат яз шикилар яна. Музейдиз килигна, ам авай гьал ахтармишна. Сулейманан машин кIвачел акьалдар хъувунин ва маса месэлаярни веревирдна. Ахпа музейдин вилик квай чIехи майдандал шадвилин мярекат башламиш хьана. Райондин кьил Нариман Абдулмуталибова суварин югъ мубарак авунихъ галаз сад хьиз, къведай йисуз шаирдин 145 йисан юбилей лап вини дережада аваз кьиле тухудайдахъ халкь инанмишарна ва музейдизни акьалтIай куьмекар гудайди лагьана. Сулейманан яратмишунар ахтармишна, дуьзгуьн къайдада тунин барадай чи алимрин вилик лап чIехи месэлаяр кумайди къейдна. Сулеймана сифте нубатда чаз, лезгийриз, чун лезгияр тирди чирна, чак милли руьгь кутуна, вири дуьньядин девлетлу чIаларихъ галаз чи лезги чIални кьадар амачир кьван девлетлу тирди субутарна... Шаирдин уьмуьрдин, яратмишунрин рекьикай суьгьбет и цIарарин авторди авуна. Гаф РФ-дин Госдумадин депутат Мамед Абасоваз гана. Ада шаирдин ирс хуьн ва давамарун патал алакьдай вири жуьредин куьмекар гудайди хиве кьуна. Мярекатдал рахай Максим Алимова, депутатри, шаирдин хтул Лидия Стальскаяди, шаир Сажидина, “Куьредин ярар” культурадин центрадин членрин са дестеди шаирдин яратмишунрикай гзаф хуш келимаяр лагьана, чпин шиирар кIелна. Сулеймана СССР-дин писателрин сад лагьай съезддал авур суьгьбетди кIватI хьанвайбурук еке шадвал, гьевес кутуна. Микрофондай адан сес, рахунар ван хьайила, кIватI хьанвайбуру и кар кIвачел акъвазна, гурлу капар ягъуналди къаршиламишна. Райондин художественный школада кIелзавай аялри (директор Ямудин Рамазанов, руководитель Нарима Эмирчубанова) Сулейманан музейдиз чпин гъилералди чIугунвай Сулейманан уьмуьр къалурзавай шикилрин чIехи стенд багъишна. Сулейманан музейдин вилик квай багъда мугьманриз суфраяр ачухна, чаяр хъвадай мумкинвални тешкилнавай. Эхирдай райондин аялрин Яратмишунрин кIвалин, Культурадин дворецдин гьевескарри чпин алакьунралди кIватI хьанвайбур гьейранарна.

Шагьабудин ШАБАТОВ
Лезги газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.