Перейти к основному содержанию

Жалэ Шихмурадова

Чипиррин хуьре дидедиз хьайи и руша исятда хуьруьн мектебдин 10-синифда кlелзава. Жалэди лезги шаир, дидед чlалан ва литературадин тарсар гузвай Фейзулла муаллим себеб яз поэзиядин сирлу алемдиз кам вегьенва. Чна Жалэдиз и рекье югъурар тlалабзава ва гьакlни адан са шумуд шиир кlелзавайбурун ихтиярдиз гузва.

Диде чан
Зегьметдин бегьерар балайриз гана,
Амукьна ваз азиятар, къуру чан.
Балад рекьел, амай чанни эцигна
Вакай рикlи янзава хьи, диде чан!
Яд-ягъияр акваз, цlраз, кузва зун,
Абрухъ галаз туна зун гьикl физва вун?
Садра хьайтlан, зи гъилер ви гъилера
Яхъ, дад-аман, минет хьуй ваз, диде чан!

Вун къакъатна,.. алатна зи хуш йикъар,
Гьинва диде, я сад Аллагь, я цавар!?
Буьркьуь хьуй зи вилер, биши хьуй япар,
Сад Аллагьди вун вахгуй зав, диде чан!
Мад кьилелай алтада кап, вуна зи,
Мад эвера, мад тlвар яхъа, вуна зи,
Милидаказ хъвер жедай а чина ви,
Чуьгьредик зун тамарзу я, диде чан!

Дуьня тапарар я, са югъ такур ваз,
А дуьняда чка рэгьят хьурай ваз!
Зи вил рекьи тухузва вун акваз кlанз,
Уьмуьрда зи эксик я вун, диде чан!


Лезги шаир
Зерре кьван таб квачир гафар,
Ви шиирдин даях я.
Лезги зарид кхьей чlалар,
Лезги халкьдин дамах я.

Ви михьи руьгь, дерин хиял
Ви шиирра чlугнава.
Ви шиирри, ви чаlлари
Элдин рикlе мугнава.
Гуьзелвилиз кхьихь, шаир,
Къуват хьурай гъилериз!
Тlуькlуьрзавай хъсан чlалар,
Хуш я, хайи эллериз!.

Гатфар

Дигай чуьлда ргаз булах,
Килигайла атlуда пагь,
Ви тlяамрал фида темягь,
Тlебиатдин бине Гатфар!
Хайи чилин диде Гатфар!

Цаварин нур, чуьлдин цуьквер,
Иервилив гуда эквер,
Бул я ашкъи, бул я, бегьер,
Бэрэкатдин гуьне Гатфар!
Муьгьуьббатдин бине Гатфар!

Лекьер я чун, лекьер я!
Гьарам тике акурла
Алтlушдач чун пехъер хьиз,
Сузадивни, зегьметдив
Фу тlуьрди я, лекьер хьиз.

Азадвал я Ватандин
Зи вилерин эквни нур,
Буьркьуь хьурай а вилер,
Ватандиз хидмет тавур.

Дакlанбуруз гьатайди
Чи гъиляй са зегьер я,
Намерд касдиз рехъ тагур,
Лекьер я чун, лекьер я!

Вар-девлетдихъ вил квачир,
Чун вил ацlай са эл я,
Душмандин вил акъуддай
Лекьер я чун, лекьер я!

Кцlар газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.