Перейти к основному содержанию

ЦIийи шиирар

Къебеле райондин ЦIийи Дызахлы хуьруьн юкьван мектебдин лезги чIалан муаллим Айтекин Новрузан руш Бабаевади Дагъустандин Гьукуматдин Университетдин Бакудин филиалдин Дагъустандин филологиядин факультет акьалтIарнава. Адахъ гьам педагогикадин, гьамни ярат-мишунрин рекьяй агалкьунар ава. Агъадихъ чна адан цIийи шиирар гузва.

Хъипи зул

Къацу пешер хъипи хьана,
Хабар гана, зул атана.
Гару чухвай тарарин мад
КьецIил тандиз  фул  атана.

Зул атана гарар галаз,
ТIурфанарни харар галаз.
Ара тагуз къвазва марфар,
Мани лугьуз, шаршар ягъаз.

Зул, ви хъипи тир рангуник
Вуч аламат ква уьмуьрдин?
Вучиз хъипи жеда вун икI,
Им гьи пад я чи умудрин?

Белки жуван мурадрик вун
Мад ахгакьдач лугьун ятIа?
Я тахьайтIа уьмуьрдин рехъ
Мензилдалди кьатI хьун ятIа?

Ава рикIе икI суалар,
Жагъин тийиз маса жаваб.
Яргъал фида зи хиялар,
Вучиз дуьнья икI я яраб?

Гагь цуьквер гваз къведа гатфар,
Гагь гад хьана къацу жеда.
Гагь зулухъ физ къвада марфар,
Гагь  жив къвана лацу жеда!

           Тахьайла

Ашкъ течирди гьикI куькIуьнрай,
РикIе ашкъид цIай тахьайла.
Сад аллагьди виридаз хьиз,
КIанивилин  пай  тагайла.

АватIани экуь вилер,
Такурда са экуьвилер,
ГьикI гурай ваз хвешивилер
Вичихъ ихьтин хай тахьайла?!

ТахьайтIа ви къастар рикIяй,
Вучда ахьтин къастарикай?
Вучда ярар-дустарикай,
Ваз са арха, гьай тахьайла?

Куьз я уьмуьр бахтар акIай,
Кьиляй-кьилиз тIалдив чIагай.
Вучда  яр ви туштIа дигайд,
Я вун адаз тай тахьайла?!

           Залан я

КIантIа агъугъ, кIантIа мийир,
И дуьньядин пар залан я.
Хъуьруьникай жедач хийир,
РикI жезватIа тIар, залан я.

ГанватIа ваз девранди тIуш,
ГьалнавачтIа девран на хуш,
ГьикI рам ийин уьмуьрд юхуш,
Ракъурнавай къар залан я.

Дердери зи канватIа рикI,
Къе кIевере тунватIа рикI,
Ашкъидикай ханватIа рикI,
Вун кIан хьунин тIвар залан я.

Самур газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.