Халкьарин садвилин лишан Лев Толстояз ва Гьажи-Мурадаз

ЧIехи урус халкьдинни дагъустанвийрин дуствилин, садвилин алакъайрикай, абур хуьни ва мягькемаруни чи гележегни хуьдайдакай тIимил рахазвач. Халкьарин дуствал - литературайрин дуствал тирдини фадлай субут хьанвай гьакъикъат я. И йикъара чи халкьарин дуствилин ва садвилин зурба лишан яз Хунзах районда, Матлас тIвар алай дагъда (ана туризмдин жигьетдайни цIийи чIехи база эцигиз гъиле кьунва) урусрин классик, арифдар Лев Толстояз ва ада Имам Шамилан регьбервилик кваз кьиле фейи дагъвийрин азадвилин женгериз бахшна кхьей “Къараткен” повестдин игит Гьажи-Мурадаз бахшнавай рикIел хуьнин комплекс - дагъдин яру къванцин (гранитдин) къаябрикай ибарат памятник ачухуниз талукь мярекатар кьиле фена. Иниз Толстоян ватандай писателдин штул, культурадин рекьяй РФ-дин Президентдин Советник Владимир Толстой, Ясная Поляна усадьбадин-музейдин директор Екатерина Толстая, Дагъустандин Халкьдин Собранидин, культурадин министерстводин ва маса ведомствойрин векилар хтанвай. Мярекатдал Хунзах райондин кьил Гьажияв Дарбишева ва маса ксари азиз мугьманар рикIин сидкьидай тебрикна. Лев Толстоя вичин гьакьван инсанпересвилин эсерралди Кавказ ва Дагъустан вири дуьньядиз анжах хъсан патахъай ачухайди, адан вири ирсини чи халкьарин дуствал, садвал хуьниз ва мягькемаруниз къуллугъзавайди, ихьтин ирс ва адетар садрани квахь тийидайди къейдна. Мугьманрин патай Владимир Толстой рахана. Ада вичин ата-бубадиз, санлай урус халкьдин векилриз ихьтин гьуьрмет авунай вири дагъустанвийриз сагърай лагьана. Им са гьихьтин ятIа чIехи мертебайрай буйругъ гана ваъ, халкьди вичин хушуналди ва такьатрихъ эцигнавай памятник я. Гьавиляй адан метлебни еке жезва, къейдна мугьманди. Дагъдин яру къванцин гьа ихьтин памятник са шумуд йис идалай вилик Лев Толстоя вичин повесть кхьей Пироговодани хкажнава. А къванни инай, Дагъустандай, тухвайди я. Ихьтин памятникри, рикIел хуьнин имаратри неинки халкьарин дуствал, садвал хуьниз, гьакI чилел ислягьвал, адалатлувал, меслятлувал мягькемарунизни къуллугъзава. Им лагьайтIа, чаз къе, кьуд патахъай диндин ва миллетчивилин экстремистри къурхуяр гузвайла, мадни артух герек я, алава хъувуна чIехи мугьманди. Мярекатар Хунзаха халкьдин чIехи шадвилер тешкилуналди давам хьана.

МЕРД АЛИ 
Лезги газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.