Чубан Барцlилан гарунгар шивдикай риваят

Са сеферда Шарвилидиз вичин шив ЦIеллемди лугьуда:— Килиг, зун йифериз вуна кутIуна гьа-а! кIвачер зунжурда тур!
Шарвилиди хабар кьуна:
— Вучиз, хьайи кар-затI авани? Шивди лагьана:
— Гьелелиг са пис карни хьанвач, амма ьун мумкин я.
— Ви сир заз лагьайтIа жедачни?
— Ам сир туш, гьакъикъат я, Шарвили,— гьуда шивди.—Эхиримжи йифериз заз ирид дагъдин кьулухъай хварари эверзава.
Абурун ван къвез, зи кьарай-аман квахьнава. Зун чилиз кек ядай кьван гьелек жезва. Эгер ку-тIун тавуртIа, завай гьаниз фин жеда.
Са кьадар вахтунда зун вавай квахьда.
— Фейиди хьиз, хквенни ийида вун!—зарафатна Шарвилиди.
— Анай хтайла, зи къуват са кьадар тIимил жеда, чамарни яваш.
Ахпа икI-акI лугьумир,— чилиз кек ягъиз, лугьуда ЦIелхемди.
— Икьван гагьди гьикI хвенатIа, гьакI хуьх жув, —лугьуда Шарвилиди. — Завай жедач, зи дуст. Вуна за лагьайвал ая,— минетда шивди,
Шарвилиди шивди лагьайвал авуна: адан кIвачериз зунжурдикай галтIамар яна. 
Алатна са шумуд югъ. Иифериз гьелек жезва ЦIеалхем. Эхирни идавай эхиз хьанач: ада акI вичин кIвачер акъажна хьи, гьулдандикай авунвай кьадарсуз кIеви галтIамар кьатI кьатI хьана. Шивди гарухъ галаз бягьс чугуна, кIунтIарилай кIунтIарал лув гана. дагъларилай дагъларал, анайни дуьзендиз.
ЦIелхемди хварарин сес къвезвай терефдихъ гьерекатзавай чIавуз, са шумуд юкъуз гъуьрчерин гуьгъуьна къекъвена хтанвай Шарвили, гзаф галат хьанваз, ахварал фенвай. Шивди ам ахварай авудиз кIанз гьикьван гьиргьир авунайтIани, гьикьван ада чилиз кек янайтIани, гада ахварай аватначир.
Са шумуд юкъуз квахьна ЦIелхем. Ахварай аватайла, адаз гзаф эверна Шарвилиди, гзаф сеферда уьфтер яна, амма шив анжах ирид югъ алатайла хтана ахкъатна.
Хтана ЦIелхем ва кьнл хура туна акъвазна. Ада вич тахсирлу тирди гьиссзавай, амма вучда, гьакI хьана май.
Хабар нивай? Хабар — Атар гъуцравай. Ирид дагъдин анихъ галай хварар гьаданбур тир кьван. И гъуцраз вичин хварарик са гьинай ятIани атай шив акахьайди эхирни чир хьана. Ада и кар кьабулнач. Инсандиз муьтIуьгъ хьайи шивдилай хьайи тай адаз вичин рамагда таз кIан хьанач.
Ада и тай, ам ханмазди, чуьлдал гадарна. Къуй телеф хьана, пехъери тIуьрай, лагьана ада.
Гила хабар нивай? Хабар — ЦIелхемдивай. ЦIелхемдиз яргъал чуьлдал гадарнавай вичин баладин ни къведа кьван! Амма и кар адавай Шарвилидиз лугьуз жедач: Шарвили адал мукъаят тир.
Бирдан хабарни авачир кар хьана.Яргъал чуьлда хипер динжарзавай БарцIилаз кIвачел къарагъиз, ярх хъжезвай тай акуна. Ада и тай, суьруьни гьализ, гагь вичин кьамал кьаз, гагьни къужахда кьаз, кIвал галай терефдихъ хкизва. Рекье ада вичел гьалтай таяр галай хварарин иесийриз минет ийиз, тайциз адетдин хварарин нек гуз хьана. КIвалив агакьдайла, адакай акьванди хьанвай хьи, гила ам БарцIила ваъ, ада БарцIил кIулал кьунвай.
— Я ба-а, ам вучтинди я, а вун алайди? — яргъал синелай хабар кьуна Шарвилиди.
— Заз чуьлдай жагъайди я, хва. Гила захъни шив-балкIан хьана!— шаддиз малумарни БарцIила.
— Ахьтин шив жедани?
— Им иниз хквезвай рекье чIехи хьайиди я, чан хва. Им рекьизвай сад тир.
— Чуьлда диде галачир тай гьинай хьурай эхир?
— Чидач заз, чидач, а кардал зунни гьейран
Ана гьа и тайни авай, гарни. Хварарин, балкIанрин гьич нини авачир.
— Я ба, ам гару ханатIа?!—лагьана Шарвилиди.
Мумкин я, и дуьньядал тежедайди авани. Хъсан лагьана вуна! И зи шивдихъ тIвар авачир, гила жеда: им Гарунгар я!
Гьа и чIавуз тарап-турупдин сесер акъатна ва инал Шарвилидин ЦIелхем пайда хьана. Ам БарцIилаз жагъай тайцив агатна, адаз кIанивилелди мез ягъиз эгечIна.
— Акунани, чан ба, вуна ви шивдихъ иеси авач лугьузвай.
— Гьикана?
— Ваз ам гьадан бала тирди аквазвачни?! —лагьана Шарвилиди.