Чир хьанач

Къанни вад йис… зун жувавай къакъатна,
Ахвар яни, аквар яни чир хьанач.
Йикъар, йифер икI гуьнгуьнай акъатна,
Ахвар яни, аквар яни чир хьанач.
 
Им вуч кар тир, вучиз ам зал туьш хьана?
Заз хиялри йифиз-юкъуз тIуш гана.
За алахъна галатуниз куьш гана,
Ахвар яни, аквар яни чир хьанач.
 
Зун кхьинри чеб галайнихъ ялна жед,
Заз кьисметди кхьинрикай гъална жед.
Зун хуш хьана, ни ятIа зал чIална жед,
Ахвар яни, аквар яни чир хьанач.
 
ЧIалахъ хьайид винел хьана тахьайдан,
Зи хайиди вилик хьана тахайдан.
За кьатIайбур инал за квез ахъайда,
Ахвар яни, аквар яни чир хьанач.
 
КичIевилер, четинвилер гьелекна,
Йифен, йикъан регьятвал за телефна.
Дегь чIаварин тарихриз зун илифна,
Ахвар яни, аквар яни чир хьанач.
 
Са буба чи Европада сад хьана,
Адаз девлет, дараматар мад хьана.
Адахъ гъуцар виридалай фад хьана,
Ахвар яни, аквар яни чир хьанач.
 
Ви чIехивал – ви кхьейбур чIур тежен,
Тараш вуч я, чапхун вуч я чир тежен,
Гъуцарин дараматар чIуьр тежен,
Ахвар яни, аквар яни чир хьанач.
 
Аламат я ви чIал къени амукьун,
Аламат я  вун хьтиндан икI юкь хун.
Капашдавай кьве грекдиз вун лукI хьун,
Ахвар яни, аквар яни чир хьанач.
 
Муькуь бубад чIехи Рома эцигна,
Къунши халкьар културадик виликна.
Вичин тIвар-ван кхьинарал илигна,
Ахвар яни, аквар яни чир хьанач.
 
На ягъидиз дуьнед сирер акурна,
Ада ви кIвал акваз-акваз чукIурна.
На фу гайда вун ви кIваляй чукурна,
Ахвар яни, аквар яни чир хьанач.
 
Са бубад чIал грек чIалак кумукьна,
Са бубад чIал латинариз амукьна.
А бубайрин къилихар чав гумукьна,
Ахвар яни, аквар яни чир хьанач.
 
Са буба чи ягъи патаз акъатна,
Цавуз фена ам Ракъинив агатна.
Адан чIалак чIуру мана акатна,
Ахвар яни, аквар яни чир хьанач.
 
Къе дуьнедал а буба са мах хьана,
Адан гьунар масадахъ ваъ, чахъ хьана.
Амни кIелна чIал акъудун захъ хьана,
Ахвар яни, аквар яни чир хьанач.
 
Чи бубайрин буба чараз улуб я,
Адан кIалуб гьа бубайрин кIалуб я.
Низ чидай ам Таргуман хва Алуп я,
Ахвар яни, аквар яни чир хьанач.
 
Алупакай Алпан хьана, Албанни,
РикIел хкваш чи Шарвили бубани.
Чун къе тек туш, чахъ галазва гьамани,
Ахвар яни, аквар яни чир хьанач.