Зун - Вун

Ваз чидани, чун чарад туш,
Вун гьа зун я, зунни вун я.
Алатна фин чи мурад туш,
Чи арада фаркь тавун я.
 
Бахтунин цам гъилик галаз,
Са дидеди ханачни чун?
Са буба чи кьилел алаз, 
Са хизанда хьаначни чун?
 
Дидед лайлай, бубад махар,
Гьа са гафар, са чIалар тир.
Зи къекъуьнар, ви дамахар,
Са формаяр, са гьалар тир.
 
Мус ятIани, гьикI ятIани,
Зурзалагар къати хьана.
Чи ацIай кIвал ни атIана,
Чи девлетар ни тухвана?
 
Буба, диде вутI хьана чи?
Чун гъилерай гъилиз фена.
Зун гъавурда акьуначир, 
Вучиз гьахъвал чилиз фена?
 
Яраб стха вутI хьанатIа?
Экъвена зун, ам ахкунач.
Яраб ам ни тухванатIа?
Са суракьни зав гахкьунач.
 
Къаргъишда за чаз къастайдаз,
Ам гьелек хьуй вуч авуртIан.
Вел экъэчIрай лап мастадиз,
Чун икI чавай чаравурдан.
 
Варцар, йисар къвез алатна,
Ягъид вилик хьана ажуз.
Чара лугьуз мез галатна,
Чи кьакьан кьил хьана агъуз.
 
Чи чил пайна, шабаш гана,
Чи кIел-кхьин – угърид гъиле.
Чи эменни тараш хьана,
КукIварна чун ирид гъилер.
 
Кьве пай хьана лезги чилни,
Чи са рикIиз кьве рехъ хьанан?
Кьулан вацI вун, юкь туширни,
Гила вакай къерех хьанан?
 
Зун и пата, а пата вун,
Чаравилив вердиш хьана.
Урус патаз алатай ви
Къилихарни дегиш хьана.
 
Вав лезгивал гумукьна жед,
Зи азабар зурбад хьана.
Зун къугъунра кумукьна жед, 
Чи мурадар барбатI хьана.
 
Гила зазни югъ аквазва,
Са кIус кьван цав ахъа хьанва.
Зи рикIин рак ваз ахъазва,
Бес вун вучиз хаха хьанва?
 
КIел-кхьин хуьн, гьам рахунар,
КIел авачир чIал рекьида.
Ша са чIалал ийин гьунар,
Михьи чIала бегьер гъида.
 
Зи чIалалай цIар чIугайла,
Зи нугъатар ни гъиликда?
Куьмекиз кIанз гъил вугайла,
На вучиз заз терс килигда?
 
Бубайрин кар багьа я чаз,
КIел-кхьинрин паяр гайи.
Гьа дарамат гъиле аваз,
Ам алахъна чIехи хъийин!
 
ИкI амукьич, зун чIалахъ я,
Къенин тарар чIехи багъ хьун.
Масадан ваъ, чи кIвалах я,
Ам хтулрив кьве къат вахкун.
 
На терсвилин рак акьала,
Бубайрин хьиз рикI чIехи жен!
Ша гъуцарихъ яб акала,
Эвелан хьиз санал хъижен!