Перейти к основному содержанию

«Аламдин» алманах

«Аламдин» алманах

Са йис винел зегьмет чlугуна арадиз акъудай «Аламдин» алманахдин вири тираж накь чи гъилиз атана. Литератур кlватlал «Марвар» ва чи журналдихъ галаз авсиятда хьайи пудкъадалай виниз кирамрин эсерар санал кlватlнавай и алманах рехи зари Сажидинан Куьре Мелик ва Гьажи Давуд шиирралди авалзаватlани, ана са хейли прозадин эсеррини чка кьунва. Гьеким Къурбанан «Зуьгьре гъед» романдикай са чlукl гайидалай кьулухъ, Фейруз Беделован «Тарашхана» комедиядилай ахпа, Нариман Ибрагьимован «Са чими гатуз», Шихжамал Шихметован «Чан алай мийит», Репия Къарибовадин «Пара кан хьайидаз тlимилни хьанач», Юсиф Халилован «Дидедин шикил» гьикаяяр къвезава. Прозадин гуьгъ Ризван Ризванован «Шарвилидин мехъер», сегьнедин этюд ва «Стlур Далагь», тарихдин драмади давамзава. ХII-XIII виш йисара уьмуьрай Стlур Далагь эсерда вичин яр Аяран гуьгъуна дуст Арчанни галаз Генжедиз акъатайла, ана девирдин чlехи зари, суфийрин шейх Низамидихъ галаз аквазва. Эсер монгол-татаррихъ галаз Стlура женгиниз гьазур хьанвай халкьдин вилик Далагьа лагьай
Аждагьанар, дэвер къвезва СтIуриз,
Рекьер-муькъвер, кIвалер-никIер чкIуриз!
Манжанахар, дегьреяр гваз зверзава,
Вай-амандив дагъни дере ацIуриз.
РикIяй аман акъуд, эллер, гьазур хьухь
А ягъийрин хура гапур акIуриз.
Далагь фида виридлайни кIвенкIвеваз,
Мугъул-татар чи мулкарай чукуриз!
гафаралди куьтягь жезва. Чи литературадин тарихда гел тадай и драма са нефесдал кlелиз жезва. Абир Эчlехвидин «Устlар», Гуьзеля Гьасановадин «Бармак вилериз ават тавурай» гьикаяйралди ва Куругъли Ферзалиеван аллегориядин кьисайралди давам жезвай проза Агъа Новгород шегьердин Девлетдин Чlаларин Унверситетдин аспирантурада кlелзавай Равиддин Щамилова устадвилелди кхьенвай «Марф» гьикаядалди куьтягь жезва.
Поэзия лагьайтlа, Сажидиналай кьил кутуна яшар хьанвай, Бажиханум Исаевади, Пакизат Фатуллаевади, Фейзудин Нагъиева, Вакъиф Муьшкуьрвиди, Фикрет Хидирова, Мегьамед Мегьманова, Адил Къайибханова, Гуьнеш Мевланова, Гьилал Аскерова, Лезги Бегьлула, Зерифа Кьасумовади, Гуьлжагьан Мисрихановади, Элдар Ферзалиева, Римма Гьажимурадовадилай кьил кутуна юкьван яшариин Сейфудин Шагьпазова, Арбен Къардаша, Шагьмардан Агъакишиева, Намик Ферзалиева, Бестии Нифтиевади, Имран Кичибегова, Билал Адилова, Марям Алискеровади, Гуьлалийрин Эйваза, Ашукь Шемшира, Вукъар Идрисова, Халидин Эльдарова, Дилмира Ашурбеговади, Элмар Саруханова, Анар Лачинова, Марсел Испиквиди, Муса Агьмедова, Вадим Адилова, Сархан Ярахмедова, ва Мегьамед Ибрагьимовалай кьил кутуна жегьил зарияр тир Лале Садировади, Камалдин Илясова, Тачир Аташова, Луиза Ахмедовади, Эсмира Бейбутовади, Мадина Рамазановади, Владик Батманова, Сулеймпн Ахцегьвиди, Гулфия Пиругълановади, Зарина Мустафаевади,Элнара Ризвановади, Саира Сефербековади, Омар Къазиханова, Раджи Гуьлмирова чинал акъудзава. Алманахда гьатнавай Жалал Багъиращтулан жавабарни галаз ганвай Имуча-мучаярни чи литературада кьетlен чка кьадайбур я. Алманахда гьакlни туькlуьрна чапдай акъатдалди чи арадай фейи Медет Арзуманован шиирарни гьатнава…
Заз чи литературадал рикl алайбуруз виридаз и алманах мубаракиз канзава.

Камран Къурбаналийрин

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.