Ватан

Хайи Ватан!
Вун галачиз,
Гарари къати,
Чпихъ инсаф
Авачиз,
Кузва рикI гъвечIи.
Ван галукьиз
Япарихъ
Лезги манидин,
Гъил галукьиз
Яшарихъ
Сефил лезгидин,
Гъамлувили незва
Зи руьгьни жигер.
ЦIигел хьана, шезва
Зи кайи вилер.
Вун галачиз
Зи фадлай
Квахьнава гатфар,
Хъвер амачиз,
Я шадвал,
Катзава йикъар.
Пашман я сес
Кфилдин.
Вуч ятIа тахсир?
Вахъ вил хьана,
Сефилдиз
Кхьизва шиир.
Хайи Ватан!
Гьикьван эхда,
Вун вилиз такваз?
Гьикьван жеда
Зун яргъара,
Накъварив рахаз?
КIан я уьмуьр
Давамариз
Заз ви къужахда,
Яргъа тамир
Зун етим хьиз,
Тагана чка…
Хуьруьнви!