Куьре Меликан «Къул хуьз экъечI!» шиирдин с цIарцIив кьадайвал туькIуьрнавай и эвер гун дуьшуьшдай арадал атанвайди туш. Къе чIал хуьн ватан хуьн кьван четин хьанва. Гьавиляй СтIал Сулейманан райондин чIалал кьару векилри 2010-йисан 26-февралдиз лезги чIал хуьнин месэладиз талукьарна Кьасумхуьрел тухвай конференциядал ихьтин эвер гун кьабулнай.
Ина чIал хуьнин ва виликди тухунин мярекатар арадал атунихъ вичин тарих ава. 2007-йисуз Имам Яралиев райондин регьбервиле хкягъайла ам лезги чIалазни эдебиятдиз кьетIендаказ фикир гуз эгечIна. Къуллугъдал тайинарзавай гьар са касдиз лезги чIал ва СтIал Сулейманан яратмишунар, гьич тахьайтIа адан са шумуд шиир хъсандиз чир хьана кIанзавай. Гьа икI, районда вири мярекатар лезгидалди тухун адетдиз элкъвена, идарайра лезги чIалакай гегьеншдиз менфят къачуз гатIунна. Райондин регьберди лезги чIалаз кIевелай къимет гуз акурла чпик руьгь акатай, виридалайни хцидаказ акъвазнавайди дидед чIалан месэла тирди кьатIай райондин яратмишдай ксари талукь идарайрин кIвалахдаррихъ галаз санал тежрибадин конференция тухвана ва районэгьлийриз жуван милли чIал хуьниз эвер гана.
Илимдин алемда вичихъ чIехи нуфуз авай чIалан алим Нариман Абдулмуталибова райондиз регьбервал гуз эгечIай сифте йикъалай чIалан месэлайриз генани кIевелай фикир гана ва ам вилик тухун паталди вири жуьредин алахъунар авуна. Адан теклифдалди районда «Дидед чIал хуьн, чирун ва гегьеншарун» тIвар ганвай программа кардик кутуна. И программадив кьадайвал, гила бахчайра, мектебра ва маса идарайра вири мярекатар дидед чIалал тухузва. Районда лезги чIал хуьниз эвер гузвай баннеррикай ва лозунгрикай гегьеншдиз менфят къачузва.
РикI шадардай кIвалахрикай садни ина гьар йисуз лезги районрин уртах илимдинни тежрибадин конференцияр тухун я. А конференцийрин материалар ктабар хьиз чапдай акъудзава ва халкьдини абурукай гегьеншдиз менфят къачузва. «Къарагъ, эллер, чIал хуьз экъечI!» вири лезги районар, вири лезги халкь патал туькIуьрнавай эвер гун я. Ша чун вири хайи чIал хуьз экъечIин!
"САМУР" газет
Добавить комментарий