Лайихлувилер къейдна

Фейзудин Нагъиев

20-апрелдиз Махачкъалада, Р.Гьамзатован тIварунихъ галай милли ктабханада кьиле фейи лезгийрин шаир, публицист, алим Фейзудин Нагъиеван яратмишунрин межлисдиз алимар, писателар, общественный деятелар, журналистар, студентар ва маса-бур атанвай. Мярекат ктабханадин къуллугъчи Секинат Мусаевади ачухна. Вичин рахунра ада Фейзудин Нагъиева лезги халкьдин мярекатра активнидаказ иштиракзавайдакай, адан къелемдикай хкатнавай шииррин ктабрикай, илимдин монографийрикай куьрелди суьгьбетна.
Гуьгъуьнлай иштиракчийрин вилик гуьруьшдин “тахсиркар” Фейзудин Нагъиев экъечIна ва яратмишунрин межлисни ада кьиле тухвана. Шаирди кIватI хьанвайбуруз вич абурун суалриз жавабар гуз гьазур тирди лагьана ва микрофондихъ бажарагълу шаир, таржумачи, публицист Пакизат Фатуллаевадиз теклифна:
— Зун Фейзудин Нагъиевахъ галаз фадлай таниш я, — гатIунна ам суьгьбетдив. — Лезги литературоведение, языкознание, шиират, гьикаят еримлу хьуник ада лайихлу пай кутунва. Зи фикирдалди, иллаки гуманитарный илимрай кандидатвилин, докторвилин диссертацияр кхьидайла сада-сад тикрарзавай дуьшуьшар гзаф жезва. Фейзудин Нагъиева Етим Эминакай, СтIал Сулейманакай кхьенвай илимдин монографийра садни тикрарнавач, адалай цIийи терефар ахтармишиз, цIийи гаф лугьуз алакьнава. Адан ахтармишунрин алемда текстологияди кьетIен чка кьазва. Им кар алай ва важиблу хел я. И рекье Фейзудин Нагъиева бегьерлудаказ зегьмет чIугвазва, мукьвал-мукьвал печатда пар квай макъалаяр чапзава… Зун адан яратмишунрикай гегьеншдиз рахадач, амма иштиракчийриз адан “Бахтлубур” тIвар алай повесть кIелун теклифиз кIанзава. Зал, и эсердал къведалди, лезги литературада гротескдин кьетIенвилер хас маса тесниф гьалтнач. Сатира, юмор хас эсерар гзаф ава, амма чи литературада гротескдин къайдада кхьенвай маса затI заз малум туш. Им повестдин сад лагьай кьетIенвал, цIийивал я, — къейдна Пакизат Фатуллаевади. Вичин рахунар ада шаирдиз бахшнавай “Жегьил алимдиз” шиир кIелуналди акьалтIарна.
Гуьгъуьнлай мярекат ДГПУ-дин филологиядин факультетдин декан, профессор Руслан Къадимован рахунри давамарна:
— Фейзудин Нагъиева Одессадин инженерно-строительный институт акьалтIарайдалай кьулухъ саки 20 йисуз и пешедай гьакъисагъвилелди зегьмет чIугуна. Гуьгъуьнлай руьгьдин эмирдалди ам литературадиз, филологиядиз атана, — лагьана профессорди. — Алай вахтунда милли чIаларал ва а чIаларикай кхьизвай инсанрив чун милли кьегьалрив хьиз эгечIна кIанзава. ГьикI лагьайтIа абуру тек са чеб патал ваъ, вири халкь патал кIвалахзава. Фейзудин Нагъиевни литературадиз карьера арадал гъида лагьана ваъ, за къейд авурвал, руьгьдин эмирдалди атана. Ада Москвадин литературадин институт акьалтIарна. Ам Россиядин писателрин Союздин член я. Адан къелемдикай шииррин, гьикаяйрин 20-дав агакьна кIватIалар, илимдин монографияр, хейлин макъалаяр хкатнава. Къенин юкъуз ам неинки шаир, гьакI алим язни тестикь хьанва… Зун и мярекатда иштиракунал шад я ва заз Фейзудин Нагъиевахъ мадни чIехи агалкьунар хьана кIанзава, — акьалтIарана вичин рахунар Руслан Къадимова.
Фейзудин Нагъиеван уьмуьрдин ва яратмишунрин рекьикай чпин фикирар медицинадин илимрин кандидат, РД-дин халкьдин духтур Азедин Эсетова, ДГПУ-дин филологиядин факультетдин студенткаяр тир Тамила Набиевадини Заира Алимегьамедовади, ДГУ-дин студент, жегьил шаир Владик Батманова, Ф.Нагъиеван яратмишунрай кандидатвилин диссертация кхьизвай аспирантка Эльвира Бабаевади, “Алам” журналдин редактор Кемран Къурбаналиева, “Лезги газетдин” кьилин редактордин заместитель Шихмурад Шихмурадова, Каспийск шегьердин школа-интернатда лезги чIалан муаллим яз кIвалахзавай Эминат Гереевади, “Дагъустан-Азербайжан” обществодин президент Абдулкъафар Агьмедова, “Дагъустан” РГВК-дин къуллугъчияр тир Гуьлера Камиловадини Хамис Шамиловади ва масабуру лагьана. Чпин рахунра Азедин Эсетовани Шихмурад Шихмурадова Фейзудин Нагъиев “Дагъустандин халкьдин шаир” тIвар гуниз лайихлу тирди къейдна. Кемран Къурбаналиева гуьруьшдин “кьилин игитдиз” лезги литературани чIал хуьнин ва еримлу авунин карда бегьерлудаказ зегьмет чIугунай “Алам” журналдин, “Лезги халкьдин зари” тIвар алай ва икьван чIавалди садазни таганвай цIийи диплом гана.
Геждалди давам хьайи межлисдин иштиракчийриз Фейзудин Нагъиеван хейлин шииррихъ яб акалдай мумкинвални хьана.

Лезги газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.