Девир я ман

Хуьруьн са пай мукьвабур я, валлагь, заз,
Гьам дидедин, гьам бубадин паюнай.
РикI ачухдиз, сивик хъвер кваз кьабулдач,
Кваз кьадач жув гьич пIапIрусдин кьатIунай,
Вил агалтна кIвализ фейи арада.

Жуван кIвализни къведайди амач къе,
Ачух къапу я, алачир гьич дапIар.
Пагь, зун кас атунихъ жезва тамарзлу,
Заз эвердай ванцихъ къаних яз япар.

Зун гишила абурун кIвализ физвайд туш,
За вуч ийин рикI дар хьайи арада.
Хкведа зун кIвализ мур-мур ацалтна,
Бетер бейкеф авур жуьре чарада.

Девир я ман, пул шагь хьанвай алайди,
Пул кIватIунин вири гара гьатнава.
Мукьвавилер, инсанвилер, хатурар,
Берекатсуз хьана, гьиниз катнава?

Я кIвал кIвалихъ, я хуьр хуьруьхъ галамач,
Гьич кьатIузни тежер крар аквазва.
Яраб мад вуч ахквадатIа вилериз?
Лугьуз, вилер ишез, рикI зи дакIвазва.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.