Дустариз

Кьил агъузна лацу чарчел
Машгъул я зун датIана.
Зи гьал, агьвал вучиз куьне
Чирдач, дустар, атана.

Зун квехъ галаз ава рахаз,
Куьн зи рикIе авазва.
Валлагь, артух жезмач юзаз,
ТIварар мецел алазва.

Лацу чарчел нехишар хьиз,
Бейтера тваз саламар,
Ша, кьил чIугваз куьн зи патав,
Гьайиф къвемир “шаламар”.

Къаршиламиш ийида куьн,
Гьа заз хас тир жуьреда.
Куьн вилериз акун бес я,
РикI тежер кьван хъуьреда.
Ахьтин демер кутада хьи,
Тахьай хьтин Куьреда…

Азиз дустар, зи гьал, агьвал
Жузаз ая атана.
Шабатован чир хьухь квез къаст —
— РикI кузва квехъ датIана.