Вахтар

Амач, вахтар фена, гьайиф,
Уьмуьрдикай хьана са йиф.
Яшайиш чи икьван зайиф
Ийиз туна на куьз, Аллагь?

Бязибурун гьал я чIуру,
Акадариз уькIуь-цуру.
Къенин уьмуьр затI я кьуру,
Алахъа чун на хуьз, Аллагь.

Сад садакай рахаз какур,
Какадариз акур-такур,
Зи нефес я къе икI агъур,
Уьмуьр жеч гьа икI физ, Аллагь.

Зал акьалтна чIехи гужар,
АлтIушна зал дердер-лужар.
Амач къе зун жуваз ухшар,
Тамир и гьал, ваз чиз, Аллагь.

Беневшадин я им гьарай,
Квадарнавай руьгьдин кьарай,
Суза къвезва къе зи хурай,
Минетин за мад низ, Аллагь?