Зи Лезгистан

Зи Лезгистан, булах я вун,
Вахъ гьамга цин къилих ава.
Гьар лезгидин дамах я вун.
Вахъ лекьерин къилих ава.

Хуьруьн кьакьан синерилай
Килигдай зун гъвечIи чIавуз.
АкI аквадай къванерилай
Ухшар я вун вили цавуз.

АкI жедай заз и чилерал
Ала са вун, гьахьиз рикIиз.
Нагъв хъиткьиндай зи вилерал,
Физ кIан жедай яргъал рекьиз.

Ингье амач такур чка,
Масанрани къекъвена зун.
Багьа я заз зи хуьр чкIай,
Лекь яз адал элкъведа зун.

Ватан, вучиз я вун сефил,
Гурмагъдин гум атIанвани?
Минет я, зи хамир гуьгьуьл,
Ви рикIе гъам акIанвани?