Вижданлуйрин къеле я

Лугьуда хьи, кьенвайбурун руьгьери
Лув гуда кьван чпин хайи кIвалерал.
Гуя, шадда абур кIвалин эквери,
Пашманвалда, экв алачтIа мичIерал.
Агъзур йисар фида дуьнья жегьил  жез,
Артмиш жеда цIийи хуьрер,  шегьерар,
Анжах руьгьер, гьамиша хьиз, жеда къвез,
Акун патал дегиш жезвай тегьерар.
Пудкъанни цIуд Гъалибвилин йисар я,
Руьгьери къвез лув гузва чи кьилерал.
Гьар са дяве бед инсанриз тарсар я,
Къалгъанар хьиз акьалтзавай чилерал.
Чаз акуна етимвални есирвал,
Дяведин цIай туьхвенвач чи рикIера,
Ваъ, къузгъунри хиве кьазвач тахсирвал,
Фашизмдин тум цазва мад рекьера.
Рехи хьанва тIварар алай невеяр,
Дерт чIугвазвай къени чIехи бубайрин.
Тахьун патал мад дуьньядал дявеяр,
Бягьсинава вилик пад кьаз хатайрин.
Я сур, дуьа, кафан кьванни  тахьайбур
Секин тазвач стхавилин сурара.
Фашизмдин тIегъуьн гваз къе атайбур
Къаришмиш я гьукуматрин крара.
ХупI буш я къе Европадин гьакимар,
Куь рикIелай дуьз яни икI алатун?
Амачни бес дуьз кьатIудай итимар?
Эхиз, маса викIиник икI акатун!
Пудкъанни цIуд йисар шумуд алатда
Икрамиз чи Гъалибвилин пайдахдиз,
Футфачияр якъинвиляй аватда,
Тухузвайбур чпи чеб къе ялтахдиз,
РикIел хкваш, гьикьван хьана атайбур
Россиядиз темягь ксар-къузгъунар.
РикIел хкваш, бармак туна катайбур,
Дуьнья тIуьртIан тух тежедай азгъунар.
Чи Урусат вижданлуйрин къеле я!
Виждансузриз гьулдан я ам юкь  хадай.
Дустариз ам ихтибарлу бине я,
Гьар макъамда вафалу яз гъил  кьадай.
Пудкъанни цIуд Гъалибвилин сувар я
Гьар миллетдин пай квай къени  суфрадик.
Гележегдиз мягькем, зиринг лувар я
Къазанмишай тупламиш яз жафадик.
Авадан хьуй, ислягьвал хьуй чилерал,
Къуй руьгьерни секин хьурай цаварал,
Дяведин цIу нагъв тагъурай вилерал,
Аскер кьена магьфе тагьуй варарал.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.