Орден къачурла

Мубарак тир ихьтин орден 
Лап къадир чиз хвена кIанда. 
Дугъриданни, идан нурдин 
КIаник кваз къекъвена кIанда.

А зегьметар чIугур зурба 
РикIел гьиз чи Ленин буба, 
Гьада къалай рекьяй зурба 
Вили - вилик фена кIанда.

За лугьудай гьажда икIа,
Инсаф туна вичин рикIа, 
Куьгьнедламай кьацIай чка 
Лап михьиз чуьхвена кIанда.

Дикъетдивди лап фикириз, 
Метлеб квай месэла куьруьз, 
Эксик тир крар туькIуьриз, 
Гьанарихъ гелкъвена кIанда.

Юлдашарин чпин ният:
Чи властдиз гуз жен къуват. 
КIватI авуна намус, гъейрат, 
Уьтквем яз къекъвена кIанда.

СтIал Сулейманан гьалар - 
Кесибдин фикир, хиялар, 
Вич мажбур тир лезги чIалар 
Жедай кьван рахана кIанда.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.