Мад Московдиз

Заз чидай гьал эвел бине 
Вун Урусият я, Москов. 
Лугьуз жед ваз ярум дуьне -  
Гьакьван вилаят я, Москов.

Са заманда атайла фад, 
Акунай заз ина вун мад, 
Гьа вядеда тиртIа вун сад, 
Гила вун кьве къат я, Москов.

KIaник патай мостоваяр, 
Худда туна трамваяр, 
Электрик газ фанарар, 
Еке имарат я, Москов.

Им я гьунар гьукуматдин, 
Эвел кесиб тир миллетдин. 
Чилин кIаник шегьер ахьтин - 
Лап зурба савкьват я, Москов.

Дуьньядиз машгьур хьана сес:
Пуд миллионни зур нефес. 
Гьелбетда, чи Совет власт 
Лап эгьли гъейрат я, Москов.

Дуьньяда гьакI тIвар - ван авай, 
Жегьил, агьил, жаван авай, 
Эхир кьилин дуван авай, 
Дуьньядин къуват я, Москов.

СтIал Сулейманаз вичиз, 
Къарандаш кагъаз авачиз, 
Я урусдин чIал тийижиз, 
Гьа кар азият я, Москов

I936

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.