Эвела ваз салам - дуьа,
Зи рикIин ишигъ Гьажибег.
Къенин къалди зунни сагъ я,
Кефияр - ачух, Гьажибег.
Гьайиф жез чун чавай яргъа,
Вучзава зи гъвечIи ваха?
Минет хьуй, чан руш Зулейха,
Вуна хъсан хуьх Гьажибег.
ГьикI ава бубад бицIи руш?
Таза билбил, а къизил къуш?
Яшамишрай зи рикIиз хуш,
Ам чандиз сагълух, Гьажибег.
Хъсан чида заз ви гьалар,
Твадай туш за чанда ялар.
Кьабул ая на зи чIалар,
ГьикI ятIа лайих, Гьажибег.
И гафарив мийир дяве,
Зи фикир лап гьатна кIеве.
Зурба табдир ава хиве,
Къанни цIуд тарих, Гьажибег.
Гьерекатун я зид пара,
Тавуникай авач чара.
СтIал Сулейман - фукъара,
Хушди я къилих, Гьажибег.
Рубрика
Добавить комментарий