Дуьньядикай кефи хана

Юлдашар, зун мийир айиб - 
Зи къаридихъ вил хьана зи. 
Залум азар хьана гъалиб, 
Фикир лап сефил хьана зи.

Зи рикIин сир сад тир, Айна, 
«Гьайиф, зи къужа» - лагьана, 
Зерре фикир мийир вуна. 
Дуьньядикай кеф хана зи.

Кьажгъан хьиз руфун ргадай, 
Йикъалай - къуз рикI дакIвадай, 
Чун кьвед са - садаз таквадай 
Арада мезил хьана зи.

А виликан уьтквем рахун, 
Амач захъ а хъуьруьн, къугъун, 
Йикъалай - къуз хьана яхун 
Чанни лап кьезил хьана зи.

СтIал Сулейманаз хатур 
Пара хьана, - а гафар тур! 
Гьинал гьалтайтIан и духтур, 
Лап мукьва майил хьана зи.

I935