Гила захъ элкъуьрна далу

Юлдашар, заз куь мецелай 
Кьуру салам - дуьани амачни? 
Фад - фад гъил чIугунa залай. 
Тек са гафун пайни амачни? 

Заз тийижиз, хьайи хата, 
Лагьа кван, квез вуч аватIа? 
Гьич зун кIандай сад тахьайтIа, 
Куьре райондайни амачни?

Заз лугьуз: Сулейман халу, 
Гила захъ элкъуьрна далу. 
ГьакIан са кагъазни кьуру 
Кхьидайд хуьряйни амачни?

Иман инсаф жедани бес? 
Фикир ая куьне кьван квез. 
Кьавум, къардаш, амле, мирес 
Гьич гьабурун патайни амачни?

Cагъ заманда ийиз гьуьрмет, 
Гила тавун жедан мирвет? 
СтIал Сулейманан къимет 
Квез пуд кепекдайни амачни?