Москов вилаят акуна

Эй, юлдашар, гьич такур заз 
Москов вилаят акуна. 
Шаир юлдашарин съезд - 
Гафар сад миллет акуна.

Ленин юлдаш мукьувай вуч 
Акуна, заз лап хьана хуш. 
Сa зерре кьванни хьанвач пуч –
Заз гьадан мейит акуна.

Дугъриданни, рахун - луькIуьн, 
Шикил вичин пара эркин, 
Куьгьне урус шаир Пушкин - 
Заз гьадан суьрет акуна.

Гьелбет, къанни ирид агъзур 
Чи фяле юлдашарин зур, 
Виш автобус гьар къуз гьазур 
Ийидай завуд акуна.

Фагьумна за анин гьалер, 
Шегьердай фир вацIун селлер. 
ЦIикьвед мертебадин кIвалер, 
Шумуд имарат акуна.

Шумуд агъзур, шумуд са виш –
Фялеяр фабрикда вердиш;
Артух хьунухь гьам яшайиш, 
Заз эдебият акуна.

Куьгьне кешишарин аса 
Пуд кепекдай тефиз маса, 
БарбатI хьай шумуд килиса, 
Заз Латни Манат акуна.

Гьелбет, анин инсанарин 
Фагьум, фикир, акьул дерин, 
Рахадайла мецер ширин, - 
Хуш тир тербият акуна.

Буш рахун туш зид гьавайда, 
Фагьумна за анин къайда. 
Анрин инсанрин арада 
Авай муьгьуьббат акуна.

Шумуд тегьер газ фанард экв, 
Инсан билбилдилай зирек;
Шумуд тегьер недай хуьрек, 
Гьар жуьре нямет акуна.

Гьич са касни амач ялгъуз, 
Санал хьана чпиз калхуз. 
Фагьумнамаз йикъалай  - къуз 
Артух тафават акуна.

Кхьиз - чIуриз течиз, нашиз, 
Жафа жеда чIал тийижиз. 
СтIал Сулейманаз вичиз 
Гьа кар азият акуна.

I934

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.