Заз такур шегьер

Юлдашар, Пятигорска 
3аз такур шегьер акуна. 
Вичин абад ихьтин чка 
Гзаф хуш сефер акуна.

ЦIерид тамам хьайи йисан 
Фяле юлдашарин игьсан, 
Чаз шафагьат авур хъсан, 
Кесибариз абулейсан 
Марф къвадай цифер акуна.

Юлдашари тухудай рехъ, 
Сада сад чеб ийиз уях, 
Ударниквилерин кIвалах, -  
Заз гьанавай вацран къвалахъ 
Ишигъ гуз гъетер акуна.

Фикир санал кIватIиз, чкIай, 
Хабар яз чпиз чпикай, 
Рекьер аваз рикIиз рикIяй. 
Бегьем хьана, заз а мукай 
ЭкъечIай къветер акуна.

Юлдашарин чпин макьсад - 
Гафар - чIалар хьунухь я сад. 
Анин политика - сиясат, - 
ТIуьначтIан, заз чир хьана дад.
Гьа багъдин бегьер акуна.

Тамам илимдикай хабар, 
Белки и дуьнья барабар,
Яру къизиларин гьанбар, 
Гьар патахъди гуз гьакI парпар 
Заз лап гьа тегьер акуна.

Фагьумна за бязи затIар, 
Гзаф я зун рази затIар, 
Ам заз чидач виридан тIвар, 
Чи юлдашар студентар 
Гьакьван заз пайгар акуна.

СтIал Сулейман и къарал 
Рази хьана, кьуна кьарал 
ЦIерид сан къелемдин тарал 
Гьар патахъ чкIай хилерал 
Лап яру цуьквер акуна.

I934

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.