Эй юлдаш, вун жемир авам

Эй юлдаш, вун жемир авам, 
Гъавурда гьатиз гьерекат. 
Кесибаринд я и аям, 
Калхуздиз кIватIиз гьерекат.

Эхир гьа калхуз я хьи гьахъ. 
Гъуьргьуь имир, гьам кIевиз яхъ, 
Ленин юлдашд эцигай ряхъ 
Ишлемишиз дуьз гьерекат.

ЧIугвамир дуьньядин къамар, 
Душмандилай къахчу камар. 
Йигин гьалда къачу камар, 
Кар вилик кутаз гьерекат.

Душманариз рикIиз серин, 
КIанзавач чи сивихъ хъуьруьн. 
Гьелбет, куьгьне залумарин 
Вилик пад атIуз гьерекат.

Душманарал имир амал, 
Буш яз ацукьмир вун кимел, 
КичIеда заз, хьайтIа чIимел. 
Тади гьал гатуз гьерекат.

Сад ая куь гафар - чIалар, 
КIватI хьухь жегьилар, агьилар, 
Вахтунда гатун техилар 
Гатадай ратIруз гьерекат.

Эй юлдаш, ават ахварай, 
Къаткимир вун, кIвачел къарагъ. 
Батракариз гзаф гьарай, 
Социализмдиз гьерекат.

СтIал Сулейманан акьул, 
Гьар са кесибди чIугваз къул, 
Кесиб синиф чебни юхсул 
Гъиз гьаниз кутаз гьерекат.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.