Фагьумнамаз жувакай хуш
Къведай гафар - чIалар кIанда.
Заманадин эниш, юхуш
Дуьз туькIуьрдай гьалар кIанда.
Фагьум ая куьгьне дердер,
Агъудилай пара бетер.
Гьа крарин веревирдер
Ийидай акьулар кIанда.
Ахьтин нече шумудни сад,
Гьар инсандихъ са сиясат.
Вуж себеб яз хьантIа азад,
Гьам фагьумдай вилер кIанда.
Жув лежбер яз эхцигна тIвар,
Течиз тадай тумун кьадар.
Гьар мезредиз тухур ятар,
Герек гьяркьуь хулер кIанда.
Жем авуна акьул кьилиз,
Жував гвай кар кьуна кIевиз,
Юлдашар, а цIийи кIвализ
Пара мягькем цлар кIанда.
Фикир ая гьарда жувак,
Тамир рикIе гьич маса шак
Гьукуматдин мягькем тир рак,
ЯцIу унлугъ кьулар кIанда.
Рубрика
Добавить комментарий