Ише тефир жуван гафар

Жуван гафар тефир ише 
Межлисда рахун хьсан туш.
ГьакI нубатсуз гъилер эчIе 
Ягъиз гьараюн хъсан туш.

Фагьумнаваз вичин саягъ, 
Вич салайни жедач уях. 
Жемир а гафунин чIалахъ, 
АтIласдилай хун хъсан туш.

Даиман чIугваз агьузар, 
Гьадакай вич хьана бизар! 
Михеннатдиз гуй а азар, 
Мерд итим яхун хъсан туш.

Гъуд эцяй тавуртIа кьама, 
Гьавурда тваз жедач ама 
ЧIуру регъвел жуван ярма 
Хкажиз регъуьн хъсан туш.

Гагь-гагь келледа гьатиз гар, 
Гагь еришдиз тежез пайгар, 
Гатфариз кьацIуриз зангар, 
ХъуьтIуьн къуз чуьхуьн хъсан туш.

Нефсинин гарданда зунжур 
Тун тавуртIа, кар жеда чIур. 
Эвел тIуьна кьел квай кIуь шур 
Гуьгъуьнлай яд хъун хъсан туш.

Гьич са касни фитнедал шад 
Тахьуй - пис затI я хирен дад. 
Бейхабар яз чIугуна яд, 
ДакIвадай бархун хъсан туш.

Вун кьацIалай куьз алатда? 
Эхир вуна хажалатда:
Чир хьухь, фекъир, вун аватда, 
Масдаз фур эгъуьн хъсан туш.

Ша, а фикир вегь на гъиляй, - 
Эхир аватда вун виляй, 
Дуст я лугьуз чIулав гъуьлягъ 
Кьулак кутаз хуьн хъсан туш.

Фикир чукIурмир, фекъир, ви, 
Ахмакьвилел жемир кIеви:
Хамир вакай масдан кефи - 
Адаз акъуьгъун хъсан туш.

СтIал Сулейманан саягъ,
Гьар патахъай тирд я уях. 
Лугьуналди жемир чIалахъ, 
Такуна рахун хъсан туш.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.