Итимвал хъсан я

Нубатсуз дирбаш жедалди, 
Гардандин кIирвал хъсан я. 
Эхир кьил яваш жедалди, 
Эвелдай тирвал хъсан я.

Аннамиш, ахмакь фукъара, 
Эхир гьатда тIиш хъуртара. 
Гзаф тахьайтIан сa пapa 
Жувахъни чирвал хъсан я.

Эй фекъир, вун акъваза дуьз, 
Ар чIугвамир юкъуз, йифиз:
Жемир вун хак акъатай хьиз, 
Валлагь, итимвал хъсан я.

Иблисдиз къунши жедалди, 
Пис кардиз къарши жедалди, 
Келлегуьз къучи жедалди, 
Дугъри факъирвал хъсан я.

Течиз жуван кардин макъам, 
ГьакI нубатсуз экъисиз кьам, 
Нашидавай жедач макьам, 
Чаз чидай кьавал хъсан я.

Эй Сулейман, акъваз тIарам, 
Лам катда, хьайитIа хурам:
Гъиле кьуна яцIу вагьрам 
Жув къапуд сивел хъсан я.