Бендедин рикi тахьуй тешвиш

Бендедин рикI тахьуй тешвиш, 
ХьайитIа - кар дуьз амукьич. 
Гьални вичин хьана дегиш 
Къуз лагьайвал физ амукьич.

Я кьуьд чир жеч адаз, я гад.
Рахуникай файдамач мад. 
РикIиз кIани сиркедин дад -  
Гьамни ваз туршиз амукьич.

Япар аваз бишивилиз, 
Кар аватна нашивилиз. 
ЗатI авачир эрчIи гъилиз 
Чапла гъил къуншиз амукьич.

Хажалатди рикIни кана, 
Килфетар жувак ккIана, 
Фикир гьар патахъ чкIана, 
Акьулни вичиз амукьич.

Я дад жеч ваз недай фак, цик, 
Я ахвар къвеч ваз ви месик. 
Нагагь ви кар тахьуй эксик - 
Садан ваз яб гуз амукьич.

Жуван бахт фейи а макъам, 
КIватI жез вичел хажалат, гъам, 
Аштерхандиз тухвайтIан хам, 
Абасдин къачуз амукьич.

Акуна заз шумуд затIар, 
Шумудни са мужизатар. 
Кесиб хьайи инсандин тIвар 
Дустаризни чиз амукьич.

Эй Сулейман, мецел зирек, 
Буржи я гьакI хьунухь, герек, 
Са къуз вазни аквада экв, 
Гьамиша мичIиз амукьич.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.