Гьахьтин тенпел кьий

Гьукуматдин кардиз гьилле 
Ийидай гьахьтин тенпел кьий! 
КIантIа батрак, кIантIа фяле, 
Гъейратсуз эвелни-вел кьий.

Гафар виниз, крар агъуз, 
Фитнекар я -  йифиз, юкъуз. 
Герек туш ам авай калхуз, 
Ахьтинд авай мехъер - мел кьий,

Я яц чидайд туш, я гамиш, 
Я ракь чидайд туш, я гимиш, 
Вич - вичиз гзаф бегенмиш 
Адан чанда авай ял кьий.

Сейке итим, чуру рехи, 
Рахадайла гафар пехъи, 
Жедайд туш я чиниз регъуь, 
Адан инсанвилин гьал кьий.

Туна рикIе шахси - гъараз, 
Юлдашривай фикир чараз, 
Ухшатмишна за ам ламраз, 
Гьадан фикир, гьа хиял кьий.

Сулейман, вун са кIус агъугъ, 
А ахмакьдин чинал рахух. 
Кьве ламраз пайиз течир мух. 
А инсандин гьа чирвал кьий.