Перейти к основному содержанию

Эхир азият кими жеч

Куьк яз акваз вaкIaв мукьвал -  
Эхир азият кими жеч. 
Ав чIугваз вердиш я чакъал, 
Вичин хасият кими жеч.

Куьз герек я яргъи рахун? 
Са къимет жеч атIласни хун. 
Хьунухьалди аслан яхун, 
РикIикай гъейрат кими жеч.

Бейхабар серф къачуналди, 
Гатаз жеч ам лашуналди. 
Филдилай я чIар финалди, 
Вад ламран къуват кими жеч.

Вичиз гъери зенд авурди, 
Вич рекьидай фенд авурди, 
РикIяй къудич жанавурди -  
Гьелбетда, геж, фад кими жеч.

Чизмач инсан акуналди, 
Гафар зурбаз рахуналди, 
Чакъалри, кIватI жез, хъуналди, 
Куьрдин вацIай яд кими жеч.

Я гунуг течиз, я къачуз, 
Я багьа течиз, я ужуз, 
Гафар зурба, серфе ажуз, 
Ихьтин мехеннат кими жеч.

Акуна заз са бязибур, 
Пехъи къилавда тваз гапур, 
Вич гьакIан юхсул, такабур, 
РикIяй адават кими жеч.

Юкъуз къавал, йифиз кьвалак, 
ТIиш экъуьриз масдан хьрак, 
Серф гьатайтIа вичин сарак 
КIвач кьадай ният кими жеч.

Тум кафалда авай рагъул, 
А къамбадиз къвер туш акьул. 
ВиртIедив тIуьртIан рекьекьул, 
Сивяй туькьуьл дад кими жеч.

Сулейман, ви гафар писда! 
Нивди я ви и силиста? 
Лугьумир на гьар межлисда -  
Сад тахьайтIа, сад кими жеч.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.