Пехърени вич катрай кьада

Бязи гьайван гьич вичелай 
Фида, я сабур тийижиз;
Алатна залпан тIишелай, 
Итимвал, абур тийижиз.

Чил вегьида кьуру гьуьлуьз, 
Са затI текъвез вичин гъилиз. 
Марфадин яд атай хулиз, 
Гуьргенни, Самбур тийижиз.

Гьар ахмакьдихъ жеда са хух, -  
ГьикI рахада - адав paxyx! 
Даим вичиз нагъварни мух 
Кутадай ахур тийижиз.

Вичин крар хьайла дуьзмиш, 
Гъейрибур тежез бегенмиш, 
Пин жунгав хьиз хьана къизмиш, 
Вичиз тфенг, тур тийижиз.

Гафунал кIан, я кlyкl текъвер, 
Сивяй чикIиз гьар патахъ гъер, 
РикIиз кIанда виртни дуьдгъвер, 
Вичин хуьрек шур тийижиз.

Я гьахъ, гьисаб, мизан терез 
Течиз, гъейрибурал хьуьрез, 
Иеси кьей кьуртIи вечрез 
Вич ацукьдай къур тийижиз.

Гьар са пехъ вич хьана лачин, 
Тежер гъуьрчез хьана кIвачин.
ПIузарар къазунда вичин, 
Сивиз кьадар тIур тийижиз.

КIантIа зарар, кIантIа хийир - 
Чидач вичин ийир - тийир. 
Гьарда санлай ийиз гьиргьир, 
Ахтани айгъур тийижиз.

Дуьнья хьана алаш - булаш,
Сулейманан гьалар яваш, 
Юхсулвили ийиз саваш, 
Я гьуьрмет, хатур тийижиз.