Перейти к основному содержанию

Вечрен къимет вад милиян

Вечрен къимет вад милиян, 
Лугьуз, чаз гужар хьана хьи. 
Шумуд бенде тахъвай пиян, 
Акьулдиз нашар хьана хьи.

Йикъа садаз жез ихтияр, 
Шумуда чаз яда цIаяр. 
Яраз тумар кьур и таяр 
ЧIуруз вердишар хьана хьи.

Чинеругдихъ галтугиз нуькI, 
Гагь дуьгуьдал хъуьреда цуькI. 
Фагьумна за са бязи сикI 
Асландиз ухшар хьана хьи.

Дуьньяд крар гъейри жуьре, 
Аслан саймиш тийиз къуьре. 
Иеси кьей къеред чIере, 
Вакни «кишмишар» хьана хьи.

Гьар са бенде вичин кIвалал 
Дуьз аламач итимвилал. 
Къаратикен цацун валал 
«Недай» емишар хьана хьи.

КицIин гурцIул кьуна хурал, 
Гьич мумкин ян фин ахварал? 
Иеси кьей кьурай тарал 
ХъуьтIуьз машмашар хьана хьи.

Шумуд лугьун, шумуд за тан, 
Шумуд айгьамдалди гатан? 
Эсилдай яз лам гьамадан, 
КIвенкI алай крчар хьана хьи.

Заманадин дерин - даяз 
Фикир ая гьарда жуваз. 
СтIал шаир Сулейманаз 
Зурба тешвишар хьана хьи.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.