Вичиз вич бегенмишдаз

Ваз на авур а чIуру кар 
Ам туькIвей кIвалах хьиз жемир. 
МичIи сура туш вун бакар, 
Экв гудай чирагъ хьиз жемир.

Ваз вунни тим хьиз жез еке, 
Дуьнья кьаз кIанда ваз мекве. 
А вун квай арабад гуьдге 
На авур чардах хьиз жемир.

Иблис кьуна на ваз шерик, 
Мийир акьван фитне - чуьруьк,
Гагь кьулухъ физ, гагь - гагь вилик,
Вун ламран къалтах хьиз жемир.

Ша вун инсафдивди рахух, 
Мийир акьван къалабулух. 
Иеси кьей ви пейинлух 
Ваз цуьквед яйлах хьиз жемир.

Амал - бетер, гафар - гуьрчег, 
Таб амаз на ийич керчек. 
Хъицикьдинни жеда лечек, 
Ваз видни бапIах хьиз жемир.

Марфадин яд къвазна пипIе, 
КтIай вирин(и) гуда лепе,
Иеси кьей руквад тепе, 
Ваз вун лап Шагьдагъ хьиз жемир.

Ша акъвазра ви сив секин, 
АтIумир халкьарин минкин, 
Макъамсуз чкадал эркин 
Гьамни куь ятах хьиз жемир.

Нубатсузар чIугваз вердиш - 
Шумудаз вун жеда дуьшуьш! 
Гьар къапуник кягъиз ви тIиш 
Ваз катран къармах хьиз жемир.

Ви, шикилдин гьа ви жуьре 
Сад - вад кас кими жеч хуьре, 
Иеси кьей биши кере, 
Ваз вунни уях хьиз жемир.

Эй факъир, дили - дивана, 
Фагьум ая на замана. 
СтIал шаир Сулеймана 
Ахъайзавайд мах хьиз жемир.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.