Акьул жуваз аваз кiанда

Наши кьасабдин нар деве 
КIвачин кьилел туькIваз кIанда. 
Еке санкьу кьуна сиве 
Кьилди вичиз жакьваз кIанда.

Я канаб, я пек чизавач, 
Вичиз я жуьт, тек чизавач, 
Цурун пуд чепек чизавач, 
Яргъи чуртар чIугваз кIанда.

Мурдар шей яз вич кицIелай, 
Михьи яз къалурда целай. 
Тамам и элдин мецелай 
Пиркавардин кагъаз кIанда.
 
Иеси кьин тавур тарта,
Кими туш сивикай хата. 
Вичин къилих фагьумайтIа, 
Виш версинин яргъаз кIанда.

Гафар гуьрчег, амал чIуруз, 
Дамах ийиз гьахьтин кьуруз. 
Экв таквадай буьркьуьбуруз 
Рапунин тIекв акваз кIанда.

Вичихъ намус, ар авачиз, 
Гъиле я пайгар авачиз, 
Пагьливан яз тIвар авачиз,
Телдин симел къугъваз кIанда.

Бязи бендеярин крар:
Кутаз кIанда цавук гурар. 
Авачиз гъенехъди варар 
Агакьдай кьван зурбаз кIанда.

Вичиз я югъ, йиф тийижиз, 
Я гьукум, теклиф тийижиз, 
Я бей, тей, элиф тийижиз. 
Илимдикай рахаз кIанда.

……………………………..
Бязибуруз акьул гуда 
Сулейман на низ лугьуда? 
Ахьтин фикир жуваз кIанда.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.