Вич яцiуз кьадай авам

Ажайиб къвез фида дуьнья, 
Я вилик, кьулухъ тийижиз. 
Са зерре кьван эдеб, гьая, 
Вичик квай синих тийижиз.

ТIвар инсан тир бязи хпер 
Кьуна кьилик кутIун епер. 
Вичел тIвар эцигда лежбер, 
Я къуьл, я мух, цуькI тийижиз.

Дустар, за квез са агьвалат 
Лугьуда, куьн гъавурда гьат, 
Вичин уьмуьрда вич сайяд 
Керекул, пехъ, ких тийижиз.

Акуна заз бязи чанар:
Гьая авачир бязи чинар, 
Акун къене вич инжинар, 
Вичиз я син, легъв тийижиз.

Крар - яваш, гафар - еке, 
Я вирт чидай туш, я сирке. 
Вичин рикIиз кIанда шуьшке 
Гатаз, масмар, мих тийижиз.

Шумудин сад гьахьтин затIар, 
Гьич течиз вичиз вичин тIвар. 
Адакай гьикI жеда ycтlap, 
Вичиз кIута, хих тийижиз.

Гафар - хъсан, амал - нашар, 
Гьелбетда, гьайвандиз ухшар. 
КIелиз кIанда Ибну - Гьажар 
Элиф - бей, тарих тийижиз.

Гьар ахмакьдиз вичин тахсир 
Гьич тийижиз гьим ятIа сир, 
Гафар вичин - професир 
Я «нету», я «юх» тийижиз.

Эй Сулейман, вун я уста,
Сабурдивди рахух аста. 
Рахамир вун гьар межлисда, 
Гьар касдин къилих тийижиз.

I923