Йикъалай - къуз мадни

Йикъалай - къуз пара ачух, 
Артух кьегьал, Испания. 
Вири са гафунал мягькем 
Я вичин эл, Испания.

Меслят сад яз, рикIер кIеви, 
Хъунухъ къаст я душманд иви, 
Гьар са фашист ийиз мягьви 
Алай рикIел, Испания,

Залумрин зуьрнед макьамар, 
Ягъункай чаз авач гъамар. 
Табагъ жедай гьабрун хамар, - 
На ягъа кьел, Испания.

Советски власт жанлу, 
Акьулдив келлеяр дулу, 
Чунни куьмек я куь далу, 
Агакьдай квел, Испания.

Гьа душманар кIватI жез - чкIиз, 
Цаз акьахда чпин рикIиз. 
Ви кьегьалвал жед эцигиз 
Сифте кIвенкIвел, Испания.

Кесибарин гафар садвал - 
Къазанмишун я азадвал, 
Гьам хьунухь яз эхир садвал 
Гьа вав гвай гел, Испания.

Шумуд варз я дяве аваз, 
Ви асланвал чир хьана заз, 
СтIал шаир Сулейманаз 
А авай гьал, Испания.

1937

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.