Перейти к основному содержанию

Маралар хьиз дагъларавай

Маралар хьиз дагъларавай, 
Хам хвейи кьушар я, рушар. 
ЦIийиз кутур багъларавай 
Ширин емишар я, рушар.

Инсафдивди вичин рикIяй 
Юлдашрин патаз килигай, 
Хъсан багьманчид илигай 
Къелемдин ичер я, рушар.

Московдай авурла гьарай, 
Авудайд я чун ахварай. 
Гьа саррафди куьн жагъурай 
Михьи тир къашар я, рушар.

ХъуьтIуьз гатуз ширин сесда, 
Шади - хуррам яз гьевесда, 
Хуьнуьх лайих тир кьефесда 
Куьн тIавус къушар я, рушар.

Таза жаван комсомалар, 
Герек артух жен амалар, 
Бахтавар я куь и гьалар, 
Хуш яшайишар я, рушар.

Дишегьли тир юлдашариз 
Муштулух хьуй ихьтин межлис. 
АкьалтIай кьил къанни вад йис 
Заз чиз, куь яшар я, рушар.

Чи юлдашар, азиз вахар, 
Агакьна квехъ бахтавар къар. 
Къалай - къуз артух кIвалахар 
Чирун квез ухшар я, рушар.

СтIал Сулейманаз килиг, 
Акатна чун азадвилик. 
А куьгьне душмандин гъилик 
Чаз хьайид гужар я, рушар.

1935

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.