Мубаракрай цiийи рекьер

Мубаракрай цIийи рекьер 
Чаз къекъвез регьят, Дагъустан! 
Дерин вацIал хьана муькъвер, 
Чирна гьар сергьят, Дагъустан.

Залумрикай чпиз чара 
Тежез, пlyзap кьуна сара, 
Зегьметчи юлдашриз пара 
Хьайид я зегьмет, Дагъустан.

Яшамишрай гьукумат чи 
И зегьметар къачур вичи:
Дагъ - дередай ийиз уьлчуь 
Хьана гьавалат, Дагъустан.

А виликан кьурагь чилер, 
Тухвана яд, хьана хулер 
Цазава бул мухар, кьуьлер, 
Жезава абад, Дагъустан.

Кесибариз ихьтин завуд 
Хьунухьиз авайни умуд, 
Фагьум ая гьа тафавут - 
Гъавурда вун гьат, Дагъустан.

Совет власть жедалди тIвар 
Авайд тирни ахьтин затIар - 
Лежберариз герек затIар, 
Гьар жуьре алат, Дагъустан.

Яшамишрай юлдашар чеб, 
ТуькIуьрна кесибрин метлеб! 
Бул хьана школа - мектеб, 
ЦIийи тIебиат, Дагъустан.

Ленин юлдашди квез кIелай 
Гафар ракъурмир рикIелай! 
Гьич ахъаймир куь гъилерай 
А яру манат, Дагъустан!

Ви девирдин и замана 
Хъсан фагьум ая вуна, 
СтIал шаир Сулеймана 
Лугьур агьвалат, Дагъустан.

1935

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.