Ни акъудна и женг - тIурфан,
Гьар садав са тфенг хьана?
Къарагъна чи Табасаран,
Им лап ажайиб женг хьана.
Аку и лезгийрин адет:
Юзбаши сад, цIуд комитет.
Гьелбет, а душмандиз медед -
Ингилисни фиренг хьана.
Герен - герен ягъиз тупар,
Жалгъандай акъатиз цIаяр.
Душмандиз дуьнья хьана дар,
Чаз гила чил лап генг хьана.
Деникин залум чи винел
Атайла, къарагъайд я эл.
Кьуна яракь, чандик кваз хъел
Гьарма сад са перленг хьана.
Эй Сулейман, алад вилик,
Халкьди тамашзава, килиг, -
Душманар акатна кIаник,
Чи гьар са кар къешенг хьана.
Рубрика
Добавить комментарий