Иеси кьей Урусият 

Иеси кьей Урусият 
Регъуьзни ухшар амач хьи! 
Малар къвез кIур гудай гьаят 
Хьана, абруз ар амач хьи!

Гьикьван эхда на, зи уьлкве, 
Гьикьван кьабулда на гуьлле? 
Вучиз кьадач вуна гъиле 
Власт, вахъ тегьер амач хьи.

Шумудаз вун жеда есир? 
Мус алудда на и тахсир? 
Вучиз гуда чарадаз сир? 
Вахъ гьич ихтибар амач хьи.

Гагь деведиз кIанда кIасиз, 
Гагь ламраз вун кIурув ягъиз. 
Чун и гьалда тунва вучиз? 
Чаз фидай ракIар амач хьи.

Чарадакай кьамир дустар, 
Гумир на чаз сурун азар. 
Амач къелем, я вахъ рангар 
Кхьидай дафтар амач хьи.

Гьар атайда из вакай рат, 
Тазвач хьи вахъ такьат, гъейрат. 
ВутIна на чи Петраград? 
Адакай хабар амач хьи.

Шумудаз на ида къуллугъ? 
Чарада ваз гудач дуллух. 
Гадарна вун кIатIун кьулухъ, 
Садазни бакар амач хьи.

Вучиз хьанва бейадалат? 
Куьз гуда на чаз хажалат? 
За фагьумна, ви агьвалат 
Рахан тийир хьар амач хьи.

Им я чаз бахтсузвал еке, 
Гьелекмир тIун на чи уьлкве, 
Гьар атайди тваз на кIвенкIве, 
Чи юлдашрин тIвар амач хьи.

Эй Сулейман, дуьм - дуьз килиг, 
Фагьума на кьулухъ - вилик. 
Дуьнья хьанва чин пад кIаник, 
Мад шак гъидай кар амач хьи.

I9I9