Юлдашар, чун чIуру рекьял...

Юлдашар, чун чIуру рекьял 
Гила далалат хьана хьи. 
Чи уьлкве чIур хьунухь мукьвал, 
Гьахьтин ишарат хьана хьи.

Чир жезамач малла, ахун:
Ахтармишиз куькни яхун, 
Гьарда вичиз ийиз чапхун 
Гьахьтин мешверат хьана хьи.

Мус акьалтIрай бес и луькIун? 
Гьич жезавач хьи чун секин. 
Са патахъай къвез Деникин, 
Им чал гьавалат хьана хьи.

Гьар атайда чил гьисаб кьаз, 
Хъуткьунарда вичихъ яб кьаз. 
Иеси кьин тавур Къафкъаз 
Бахтсуз вилаят хьана хьи.

Гьар атайда вегьиз чал рух, 
Са патакъай къвез Бичерух, 
Ади вар вичин, дади юх -  
Жафа гьуьруьят хьана хьи.

Са патахъай къведай туьрквер, 
Шумудаз чун жеда нуькер? 
Чи Куьредиз ягъиз кьуькер, 
Им лап мусибат хьана хьи.

Сулейман гьич рахач нешар, 
Гафариз авачиз къаншар. 
Агакьзамаз чи юлдашар, 
Абур вири кат хьана хьи.

I9I9