Гьикьван чiугван и агьни уф?

Иеси кьин тавур Къафкъаз, 
КьацIалай алат хьана хьи. 
Гьар атайда вун вичив кьаз 
Тухудай нубат хьана хьи.

Гьикьван чIугван и агьни угь? 
Гьар атайда гуда чаз цIугъ, 
Гьар атайда гатадай юг 
Им иессуз рат хьана хьи.

Гьар атайда цадай бустан 
Шумудаз хьуй и Дагъустан?!
Гагь ви ашна жеда масан, 
Вакай бейгъейрат хьана хьи.

Чир жезамач кIекни фере, 
Ажеб авам хьана Куьре! 
Жуваз течиз дерин дере, 
Бейхабар ават хьана хьи.

Шумуд къвез чаз жеда векил? 
Шумуд патахъ хьуй и шикил? 
Са патахъай къвез Врангил, 
Залумар чал кIватI хьана хьи.

Чир жезамач ични чичIак, 
Мус акъатдай инай чи шак? 
Са патахъай къведай Колчак 
Винел гьавалат хьана хьи.

Гьар атайда вегьиз чал рух, 
Жезава чи гьалар язух. 
Са патахъай къвез Бичерух 
Чи уьлкведа гьат хьана хьи.

Амач чахъ рахадай мумкин, 
Мус жеда бес чи гьал секин? 
Са патахъай къвез Деникин, 
Зурба хажалат хьана хьи.

Чир жезамач верчер, кIекер, 
СакIан чаз аквазвач эквер. 
Са патахъай къведа туьрквер, 
Гьабруз вилаят хьана хьи.

Гьар атайда чун вердишар 
Ийиз, гъиле кьуна лашар. 
Агакьзамаз чи юлдашар, 
Гила гьуьруьят хьана хьи.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.