Вун гьикьван алчах я, Къафкъаз!

Икьван эллер ийиз на кIватI 
Им вучтин ягънагъ я, Къафкъаз? 
Вахъ галаз на чунни барбатI 
Авун вуч кIвалах я, Къафкъаз?

Им мусибат хьана еке, 
ЧIур мийир тIун на чи уьлкве. 
Гьар атайда вичиз гуьлге - 
Ацукьдай чардах я, Къафкъаз.

Гагь хузар гъиз, гагь на чIижер, 
Гуж мийир чаз эхи тежер, 
Гьар атайда вичиз ичер 
АтIуз недай багъ я, Къафкъаз.

Шумуд кас ваз жеда шерик, 
Шумудаз на гуда шилик, 
Сан кьиле вун ийиз терик, 
Шумуд вав уртах я, Къафкъаз!

Мад авачни вилаятар? 
Куьз акъатна икьван ви тIвар? 
Гафар гуьрчег, амал - мурдар. 
Вун гьикьван алчах я, Къафкъаз!

Шумудав вун къугъвад къумар, 
Шумудаз на гуда румар. 
Серф гьатайла, яхун ламар 
Къвез недай яйлах я, Къафкъаз.

Ява паб хьиз арадаллай, 
Даима вил чарадаллай. 
Им вуч яргъи «яхул даллай» 
АкьалтI тийир мах я, Къафкъаз?

Кьуна гъиле еке куьни, 
Кьил кукIварин декIена ви! 
Гьар атайда вичиз тини 
Ишиндай чанах я, Къафкъаз.

Гьар атайда гьализ чефте, 
Вегьида ви кьилел фите. 
Гьяд, саласа, юкъуз гьафте 
Хьунухь вуч кIвалах я, Къафкъаз?

Душманариз дерди кIелиз, 
Дустарикай вуна хъелиз, 
Сан кьиле финиф са гъуьлуьз 
Бес им вуч саягъ я, Къафкъаз?

Сулейманан веревирдер 
Лугьунар я ихьтин бейтер.
Гьар атайда ягъиз метIер 
Яд хъвадай булах я, Къафкъаз.

 

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.